भांगरभूंय | प्रतिनिधी
भांगरभूंय । प्रतिनिधी
वास्कोः मोपा विमानतळा उपरांत दाबोळी विमानतळार लेगीत विमान उड्डाणांची कोंकणींतल्यान म्हायती दिवपाक सुरवात केल्या. फातोड्डेचो आमदार आनी गोवा फॉरवर्ड पक्षाचो सर्वेसर्वा विजय सरदेसाय हांणे गोंयांतल्या ह्या दोनूय विमातळांचेर कोंकणींतल्या विमानाच्या उड्डाणांची म्हायती दिवपाची सूचोवणी केल्ली.
मोपा विमातळा वयले डिसप्ले बोर्डाचेर विमान उड्डांणाची म्हायती दिवपा खातीर जे तरेची कोंकणी वापरतात ते विशीं सोशल मीडियाचेर सद्या चर्चा चल्ल्या. कांय नेटिझना प्रमाण ती कोंकणी बोरोबोर जाल्यार कांय जाण सारकी आशिल्ल्याचो दावो करतात. दाबोळी विमानतळ अधिकाऱ्यांनी फावो त्या कोंकणी उतरांचो उपेग करचो अशी मागणी जावपाक लागल्या
कोंकणी, हिंदी आनी इंग्लिश भाशेंतल्यान विमान उड्डाणांची म्हायती दिवपाची सूचोवणी केल्ले खातीर दाबोळी विमानतळ अधिकाऱ्यांनी ट्वीट करून विजय सरदेसाय हांचे उपकार मानल्यात. फाटल्या 27 फेब्रुवारीक विजय सरदेसाय हांणी कोंकणीतल्यान विमान उड्डाणांची म्हायती दिवपाची सूचोवणी केल्ली. विजय सरदेसाय हांणे केल्ले मागणे प्रमाण इंडिगोच्या अहमदाबाद- गोंय विमानांत कोंकणींतल्यान प्रवाश्यांक सूचोवणी दिवपाक सुरवात केल्ली. ते उपरांत विमानतळार उड्डाणाची कोंकणींतल्यान म्हायती दिवपाक सरदेसाय हांणी सांगिल्लें. तशें ताणे ट्वीट लेगीत केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
