भांगरभूंय | प्रतिनिधी
भांगरभूंय । प्रतिनिधी
माशेलः कुमारजुवेंकारांची आराध्य देवी श्री शांतादुर्गा कुमारजुवेंकरीण देवीचे शिगम्योत्सवा खातीर शेंकड्यांनी वर्सांच्या परंपरे प्रमाण माशेल तारीवाड्या वयल्यान थापणार हांगच्यान गावांतवाडो कुमारजुवें हांगा बुधवारा दनपारां भाविकांचे उमेदींत आगमन जालें.
माशेल हांगच्या देवळांत धर्मीक विधी जाल्या उपरांत देवीची पालखी बॅंडवादना सयत देऊळवाडो, बाजारवाडो मार्गान माशेल तारीवाड्यार पावल्या उपरांत ती व्हड्यांत घालून थापणार हांगा हाडली. उपरांत थंयच्यान पारंपरीक रस्त्यान गावांतवाो हांगा हाडून तिची विधीवत पूजा केली. देवीच्या कुमारजुव्यांतल्या वास्तव्यांत 15 तें 21 मार्च मेरेन तरेकवार सांस्कृतीक कार्यावळी रातीं 8 वरां सावन सुरू जातल्यो. दर दिसा रातीं 10 वरांचेर नाटकांये प्रयोग जातले.
22 मार्चाक गुडीवाडव्या निमतान धर्मीक विधी, सांजेच्या 3 वरांचेर संवत्सरफल वाचन, आरत्यो, तीर्थप्रसाद जावन सांजे 4 वरांचेर पालखीची कुमारजुवें गांवात दरेका घरांत पूजा जातली. सुमार एक म्हयनो देवीची पालखी घराघरांनी वतली. कुमारजुवेचे लोक खंय आसल्यार देवीची ओटी भरपाक गांवांत येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
