भांगरभूंय | प्रतिनिधी
आरबीएल बँकेचो कॉर्पोरेट सोशल रिस्पॉन्सिबिलिटी-सीएसआर उपक्रम राबयलो
पणजी: आरबीएल बँकेच्या कॉर्पोरेट सोशल रिस्पॉन्सिबिलिटी- सीएसआर उपक्रमा खाला गोंयच्या आनी खास करून आदिवासी वाठारांतल्या शाळांच्या चली विद्यार्थिनींक 250 सायकली वाटल्यो. पर्वरीच्या गोंय क्रिकेट संघटणेच्या मैदानाचेर आयोजीत कार्यावळींत मुख्यमंत्री डॉ. प्रमोद सावंत हांचे हस्तुकीं राज्यांतल्या 20 गांवगिर्या शाळांतल्यान निवड केल्ल्या अनुसूचीत जमातींतल्या 250 विद्यार्थिनींक सायकली वाटल्यो. ह्या वेळार मुख्यमंत्री उलयताले. चली भुरग्यांच्या शिक्षणीक सक्षमीकरणा खातीर आरबीएल बँके वतीन हो उपक्रम राबयता. आरबीएल बँके वतीन ह्या उपक्रमा खाला देशभरांतल्या एक हजार विद्यार्थिनींक सायकली वाट्टले.
समाज कल्याण मंत्री सुभाष फळदेसाय, जीसीएचे अध्यक्ष विपूल फडके, सचीव रोहन देसाय, वित्तीय संस्था गट मुखेली रोहीत अग्रवाल, विपणन सहकार्य मुखेली अभिजीत सोमवंशी, शाळांचे मुख्याध्यापक, शिक्षक आनी लाभार्थी विद्यार्थी कार्यावळीक हाजीर आशिल्ले.
सरकारान बायलांच्या सक्षमीकरणाचेर भर दिल्या. देशांत दादले-बायलांचें प्रमाण राखपा खातीर प्रधानमंत्र्यांनी सुरू केल्ल्या बेटी बचाओ बेटी पढाओ अभियानान महिला सक्षमीकरणाचे कार्यावळीची सुरवात जाली. चली भुरग्याचो जल्म, तिचें शिक्षण आनी लग्न अशा जायत्या येवजण्यांची अंमलबजावणी करून हे मोहिमेची सुरुवात जाल्या. ही मोहीम येसस्वी करपा खातीर कॉर्पोरेट मळावेल्या बँकांनी मजत करपाची गरज आसा, अशें मुख्यमंत्री डॉ. प्रमोद सावंत हांणी फुडें सांगलें.
समाजकल्याण मंत्री सुभाष फळदेसाय हांणी आरबीएल बँकेच्या उडठ उपक्रमाची तोखणाय करून गावगिर्या वाठारांतल्यान शाळांनी वचपी विद्यार्थिनींक ह्या उपक्रमाचो बरो फायदो जातलो, अशें सांगलें.
राज्यांत कांय अशे वाठार आसात जंय प्रवासाची सोय ना. विद्यार्थ्यांक पयसुल्ल्यान चलत शाळेंत पावचें पडटा. विद्यार्थ्यांच्या पालकांक आपल्या शाळेंत वचपी भुरग्याक सायकल विकती घेवन दिवप लेगीत परवडना. गरजू विद्यार्थिनींक सायकल मेळिल्ल्यान तांची शाळेंत वचपाची उमेद वाडटली, अशें तांणी सांगलें.
सुरवातेक आरबीएल बँकेच्यो वित्तय प्रमुख श्रीमत पारुल सेठ हांणी मानेस्तांक येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
