भांगरभूंय | प्रतिनिधी
भांगरभूंय । प्रतिनिधी
काणकोणः दाल्गादो कोंकणी अकादमीच्या (डीकेए) ‘दवरणे’ ह्या कोंकणी निबंद झेल्याचें प्रकाशन काणकोण पालिका मंडळाचो आदलो नगराध्यक्ष आनी सध्याचो नगरसेवक सायमन रेबोलो हाचे हस्तुकीं फाटल्या आयताराक चावडी- काणकोण हांगा सेट तेरेझा हॉलांत जालें. ह्या वेळार फादर इजिदोर डायस, पॅरीस प्रिस्ट सेल्सो फर्नांडीस, डीकेएचो अध्यक्ष विलियम फर्नांडीस,उपाध्यक्ष फादर मेरॉन बार्रेटो, सचीव व्हिन्सी काद्रूस, लेखक आल्बर्ट जेकीस, वासाल्वो कार्व्हालो आनी एल ग्रासियस हाजीर आशिल्लो.
लेखक आल्बर्ट जेकीस काणकोणचो ज्येश्ठ लेखक आसा. फुडले पिळगे खातीर आमी आमची रोमी कोंकणी लिपी आनी गोंयची संस्कृती राखून दवोरपाक जाय. आल्बर्ट जाकीसान दवरणे पुस्तक बरोनव नवे पिळगेक उर्बेभरीत केला अशें सायमन रेबेलो हांणे सांगले दवरणे म्हणल्यार वजें दवोरपाचें सादन, ह्या पुस्तकांतल्यान नवी म्हायती मेळटली, हें पुस्तक जाण्यां वांगडा नवे पिळगेन वाचपाक जाय तेन्नाच आमची कोंकणी तिगतली अशें ताणे सांगलें..
दाल्गादो कोंकणी अकादमीक 34 वर्सां पुराय जाल्यांत. अकादमीचे 700 वांगडी आसात. कोणकोणच्या लोकांनी अकादमीचे वांगडी जावचे हे खातीर बसका घेतले, गोंयकारांनी कोंकणी वाचपाक जाय आनी बरोवपाक जाय अशें सेल्सो फर्नांडीसान सांगलें.
रोमी लिपयेंतलें साहित्य वयर काडपा खातीर दाल्गादो कोंकणी अकादमी जे तरेन वावुरता ताची फादर मेरॉन बार्रेटोन तुस्त केली. व्हिन्सी काद्रूसान निबंद झेल्याचेर उजवाड घातलो. आल्बर्ट जेकीसान काणकोणचे लोक जिणेचेर पुस्तकांतल्या उजवाड घातला अशें ताणे सांगलें.
आमी आमचे बुद्धीचो समाजाच्या बऱ्या खातीर उपेग करपाक जाय अशें फादर इजिदोर डायसान सांगलें. वासालो कार्व्हालोन सूत्रसंचालन केलें जाल्यार विलियम फर्नांडीसान उपकार मानले. पुस्तक प्रकाशन कार्यावळीक कोंकणी साहित्य मोगी व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
