भांगरभूंय | प्रतिनिधी
भांगरभूंय । खबरां मेज
पणजीः गोंयांतलो तरणाटो लेखक, तियात्रकार आनी पत्रकार मार्कुस गोन्साल्वीस हाची 17 मार्च सावन सुरू जावपी अंदूच्या 22व्या कोंकणी युवा साहित्य संमेलनाचो अध्यक्ष म्हणून एकमतान निवड जाली. विद्यार्थी आनी तरणाट्या साहित्यिकां खातीर आशिल्लें हें दोन दिसाचें वर्सुकी संमेलन गोंय कोंकणी अकादेमी आनी उसगांवच्या ज्ञानप्रसारक मंडळाचें म्हाविद्यालय हांच्या जोड पालवान आसगांव हांगा जातलें.
46 वर्सां पिरायेचो युवा साहित्यीक मार्कुस गोन्साल्वीस शाळेंत शिकतास्तना कोंकणीच्या देवनागरी आनी रोमी लिपयेंतल्यान तशेंच मराठी आनी इंग्लिशींतल्यान साहित्य निर्मण आनी हेर लिखाण करीत आसा. ताणे आतां मेरेन कविता, कथा, एकांकी, चरित्र, संशोधन पत्रां तशेंय तियात्र अश्या साहित्य प्रकारांतल्यान आपली सर्जनशीलता उक्तायल्या.
ताच्या हे साहित्य निर्मणेची दखल घेवंन जायत्या संस्थांनी ताचो भोवमान केला. गोंय सरकाराचो प्रतिश्ठेचो युवा सृजन पुरस्कार, गोंय कोंकणी अकादेमी आनी दाल्गादो कोंकणी अकादमीचो युवा साहित्यीक पुरस्कार, गुलाब म्हयन्याळ्याचो वर्सुकी लेखक पुरस्कार, फेलिसियो कार्दोज यादस्तीक उत्कृश्ठ पत्रकार पुरस्कार आनी कोंकणी भाशा मंडळाचो सर्वोत्कृश्ठ पत्रकार पुरस्कार ताका फावो जाला.
त्या भायर साहित्य, संशोधन, नाट्य लेखन आनी नाट्य दिग्दर्शनांतल्या ताचे कुशळताये खातीर कला अकादमी सारक्यो सांस्कृतीक संस्था आनी म्हयनाळ्याचे जायते पुरस्कार गोन्साल्वीस हाका मेळ्ळ्यांत. ‘क्रिस्तावांचो जागोर’ ह्या विशया वयले ताचे मोलादीक संशोधन यत्ता णवेच्या विद्यार्थ्यां खातीरच्या अभ्यासक्रमांत आसपावीत केलां.
साश्ट तालुक्यांतल्या राय गांवांत जल्मल्ल्या ह्या प्रतिभाशाली तरणाट्या साहित्यिकांची आतां मेरेन कविता, कथा, ललित साहित्य, एकांकी, चरित्र, संशोधन आनी तियात्रा वयलीं तशेंच भुरग्या तियात्रा वयलीं 13 पुस्तकां प्रकाशीत जाल्यांत. देवनागरी आनी रोमी लिपयेंतली कोंकणी, मराठी तशेंच इंग्लिश वेवसायीक पत्रकारिते भायर ‘उमाळे’ ह्या मासिकाचें तो संपादन करता. सध्या मार्कुस ‘हेराल्ड’ ह्या इंग्लिश दिसाळ्याचे साश्ट तालुका तशेंच दक्षीण गोंयांतल्या वाठारांतले वृत्तांकन करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
