भांगरभूंय | प्रतिनिधी
गवे लोकवस्तींत आयिल्ल्यान लोकां मदीं भिरांत
भांगरभूंय । प्रतिनिधी
संजीवनी साकर कारखान्या मुखार वयल्या दोंगराचेर लागिल्लो उजो नियंत्रणांत आयलां. पूण उजो पिळये धारबांदोडेंच्या भुमिका देवळाच्या वाठारांत पावला. मंगळारा सकाळ सावन कर्मचारी परतून दोंगराळ वाठारांत वतले. उज्याक लागून सोमारा 5 गवे लोकवस्तींत आयिल्ल्यान लोकां मदीं भिरांत पातळ्ळी. संजीवनी साकर कारखान्या मुखा वयल्या दोंगरेचेर उज्यान नेट घेतल्ल्यान सोमारा थळाव्या लोकांनी उजो नियंत्रणांत हाडपाक मजत केली. सरपंच बालाजी गांवस हांणी तातूंत म्हत्वाचें योगदान दिलें. दनपार मेरेन संजीवनी साकर कारखान्याचे दिशेन दनपार मेरेन उज्याचेर नियंत्रण मेळोवपांत रान खात्याच्या अधिकाऱ्यांक येस आयलें, पूण उजो पिळये वाठारांतल्या भुमिका देवळा मेरेन पावलो.
दोग जाण ताब्यांत
पिळये धारबांदोड्यां सोमारा राती उजो लागिल्ले सुवातेर गेल्ल्या दोगांक रान खात्याच्या अधिकाऱ्यांनी ताब्यांत घेतले. तातूंत फोंडेंच्या एका आरटीआय कार्यकर्त्याचो आस्पाव आसा. राती उसरां मेरेन ताची चवकशी सुरू आशिल्ली.
संजीवनी साकर कारखान्याच्या मुखा वयल्या दोंगराक लागिल्लो उजो पिळये वाठारांत पाविल्ल्यान फाटल्यान दोन दिसां सावन रान खात्याचे अधिकारी त्या वाठारांत रातचे उसरां मेरेन गस्त घालतात. सोमारा उज्याचेर नियंत्रण दवरून 40 कर्मचारी परत येताले तेन्ना तांकां दोग जाण रानांत वतना दिसले, तांणी तांकां हटकूंक ना. पूण सांजे उसरां रान खात्याचे अधिकारी संतोष फडते आनी विश्वास चोडणकार वाठारांत पळोवणी खातीर गेले तेन्ना तांकां भुमिका देवळाचे गेटी लागसार एक स्कुटर दिसली. त्या वेळार अधिकाऱ्यांनी चवकशी केली तेन्ना दोग जाण दोंगराळ वाठारांत गेल्ल्याचें कळ्ळें.
सांजेच्या 7 वरांच्या सुमाराक दोंगराळ वाठारांत गेल्ले भुमिका देवळाचे गेटी कडेन आयले तेन्ना अधिकाऱ्यांनी तांकां ताब्यांत घेतले. रान खात्याच्या कार्यालयांतल्यान मेळिल्ले म्हायती प्रमाण पिळये वाठारांत उजो लागला थंय बिबट्याचो वावर आसा. ताका लागून उज्याचेर नियंत्रण मेळोवपाक गेल्ल्या सगळ्या कर्मचाऱ्यांक रात जावचे आदीं देवळा कडेन येवपाचो आदेश रान खात्याच्या अधिकाऱ्यांनी दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
