भांगरभूंय | प्रतिनिधी
पणजी: गोवा कोंकणी अकादेमी पुरस्कृत, विद्या प्रबोधिनी म्हाविद्यालय, पर्वरी तशेंच गोवा राज्य जैव-विविधता मंडळ, गोवा सरकार हांच्या जोडपालवान ‘गोंयच्या साहित्यांत खण-वेवसायाचें पडबिंब’ ह्या विशयाचेर बुधवार ता. 15 मार्चाक गोंय राज्य प्रदुशण नियंत्रण मंडळ गोंय सरकार, साळगांवच्या सभाघरां एका दिसाचो राज्य पांवड्यावेलो परिसंवाद घडोवन हाडला. ह्या परिसंवादाच्या उक्तावण सुवाळ्याक उद्घाटक म्हणून गोवा कोंकणी अकादेमीचे उपाध्याक्ष वसंत भगवंत सावंत तशेंच बीजवक्ते म्हणून गोवा राज्य जैव-विविधता मंडळाचे वांगडी सचीव प्रदीप सरमोकादम हाजीर आसतले.
पुराय दीस चलपी ह्या परिसंवादाक कोंकणी तशेंच मराठींतले लेखक आनी प्राध्यापक खण वेवसायाचेर चित्रण जाल्ल्या वेगवेगळ्या साहित्य प्रकारांचेर संशोधन प्रपत्रां सादर करतले. गोंयचे खण वेवसायाचो गोंयच्या समाजाचेर जाल्लो प्रभाव, तशेंच खण वेवसाय बंद पडल्या उपरांतचो प्रभाव ह्या सगळ्यांचो आस्पाव घेवप अशी रूपरेशा ह्या परिसंवादाची आसतली. ह्या परिसंवादांत खण वेवसायाचें चित्रण गोंयच्या वेगवेगळ्या साहित्य प्रकारांत कशें आयलां हाचेर विचार जातलो. परिसंवादाच्या पयल्या सत्रांत गोंयच्या कथांनी खण वेवसांयाचें चित्रण कशें जालां हाचेर प्रा. डॉ. गीता गावस मराठी कथा संदर्भात उलयतली जाल्यार प्रा. गोरक शिरसाट कोंकणी कथेंचेर उलयतले. ह्या सत्राचे अध्यक्ष प्रो. प्रकाश वजरीकार आसतले.
दुसर्या सत्रांत गोंयच्या कादंबरींनी खण वेवसायाचें चित्रण कशे तरेन आयलां हाचेर प्रा. डॉ. अपुर्वा बेतकेकार आनी विठ्ठल गांवस गोंयच्या कोंकणी आनी मराठी कादंबरींचो आढावो घेतलीं. ह्या सत्राक अध्यक्ष म्हणून गजानन देसाय हाजीर आसतले. तशेंच निमाणें सत्र गोंयच्या नाटक आनी हेर साहित्य प्रकारांनी खण वेवसायांचें चित्रण कशे तरेन आयलां हाचेर नारायण महाले आनी प्रा. मानसी धाऊस्कार आपले विचार मांडटलीं. ह्या सत्राचे अध्यक्ष प्रा. डॉ. प्रकाश पर्येंकार आसतले. हे कार्यावळीक सगळ्यांनी व्हडा सख्येंत हाजीर रावचें असो उलो महाविद्यालयाचे प्राचार्य डॉ. भुषण भावे हांणी मारला. ह्या वेळार गोवा कोंकणी अकादेमी वतीन पुस्तक प्रदर्शन भरतलें. हाचोय आस्वाद सगळ्यांनी घेवंचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
