भांगरभूंय | प्रतिनिधी
ग्लेन टिकलो हांच्या वाडदिसा निमतान हळदोण्या विवीध कार्यावळींचें आयोजन
म्हापशें ः हळदोणचे आदले आमदार आनी भाजपाचे प्रदेश उपाध्यक्ष ग्लेन सोझा टिकलो हांचो वाडदीस हळदोणच्या कार्यकर्त्यांकडल्यान मनयलो.
ह्या निमतान मतदारसंघांत विवीध कार्यावळींचें आयोजन केल्लें.
खोर्जुव्यां दोळे तपासणी शिबीर, ईश्रम आनी आबा कार्ड नोंदणी शिबीर, मयडेंच्या पंचायत सभाघरांत कॅन्सर निदान शिबीर, उसकय जेवणाची सर्त आनी बस्तोड्यां सत्पुरूष बांदेश्वर सभाघरांत बायलां दीस अश्यो कार्यावळी वाडदिसा निमतान आयोजीत केल्ल्यो.
बस्तोड्यां पंचायत वाठारांत 35 लाखांच्या उदरगतीच्या कामांचो शुभारंभ ग्लेन टिकलो हांचे हस्तुकीं जालो. हातूंत एमआरएफ (मटेरीयल रिकव्हरी फॅसिलिटी) सुविधाय, सांताक्रूज प्रभाग सात हांगा पेवर्सचें बांदकाम, बोआविस्ता हांगा प्रभाग पांचांत पांय वाटेचें बांधकाम अश्या कामांचो आसपाव आसा.
पंचायती वतीन आदले सरपंच सावियो मार्टीन्स आनी पंचायत मंडळान गांवांतल्या लोकां खातीर उपलब्ध केल्लीं वैजकी उपकरणां आनी वेवसायीक सामाजीक बांधिलकी खाला उपलब्ध केल्ल्या 1200 कोयरांचे डबे ह्या वेळार वाटले.
ही कार्यावळ बस्तोडच्या मार्टीन्स हांच्या कार्यालयांत जाली. ह्या वेळार ग्लेन टिकलो हांणी केक कापून कार्यकर्त्यां वांगडा आपलो वाडदीस मनयलो.
ह्या वेळार सरपंच आँजेला मार्टीन्स, उपसरपंच सुनिता लोटलीकार, पंच राखी नारोजी, सुभाष मोरजकार, रितेश बेळगांवकार, राजेश पिळर्णकार, सनिला साळगांवकार, आदले सरपंच सावियो मार्टीन्स, नगरसेवक प्रकाश भिवशेट, जिल्हो पंचायत वांगडी मनिषा नायक, भाजपाचे उत्तर गोंय उपाध्यक्ष फ्रेन्की कार्व्हालो, शंकर गाड आनी आदले सरपंच, मंडळाचे पदाधिकारी आनी हेर कार्यकर्ते हाजीर आशिल्ले.
हळदोण्यां भाजपाचो बावटो परत हुबोवया
फाटलें वर्सभर हळदोणां मतदारसंघांत कसलींच उदरगतीचीं कामां जावंक ना. आपणें जीं उदरगतीचीं कामां केल्लीं ताचोच शुभारंभ जालो. वेंचणुके उपरांत कांय काळ आपूण भायर सरूंक नाशिल्लों. पूण लोकांक लागून आपल्या कामाक सुरवात केली. येवपी लोकसभा वेंचणुकेचे फाटभूंयेर मतदारसंघांत सगळ्यांनी एकवटान काम करून पक्षाक बरींच मतां मेळोवन दिवची हो आपलो यत्न आसतलो. तशेंच फुडलीं तीन-चार वर्सां काम करून ह्या मतदारसंघांत भाजपाचो बावटो परत हुबोवया असो उलो ग्लेन टिकलो हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
