भांगरभूंय | प्रतिनिधी
भांगरभूंय । खबरां मेज
पणजीः गोंयचे पयले मुख्यमंत्री भाऊसाहेब बांदोडकार भुंयपूत आशिल्ले. तांच्या मनांत गांवगिऱ्या लोकां विशीं आस्था आशिल्ली. गोंयांतल्या सगल्या गरीब लोकांनी शिक्षण घेवचें अशी तांची इत्सा आशिल्ली. ताका लागून तांणी पुराय गोंयांत शाळा सुरू केल्या. आमी सगळ्यांनी तांचें अनुकरण करपाक जाय. चड करून सध्याच्या राजकारण्यांनी भाऊंचो आदर्श घेवपाक जाय अशें सभापती रमेश तवडका हांणे सांगलें.
दोनापावलच्या गोंय इंटरनॅशनल सेंटरांत आयताराक आयोजीत केल्ल्या “भाऊ आठवांचा पारिजात” ह्या पुस्तकाचें प्रकाशन केल्या उपरांत तवडकार उलयताले. भाऊंची धाकटी चली आनी वास्कोची उद्देजक ज्योती बांदेकार हिणे हें पुस्तक बरयलां. तवडकार ह्या वेळार मुखेल सोयरे म्हणून उलयताले. भाऊचें जिणेंतल्यान दरेकल्याक कसली ना कसली तरी शिकवण घेवपाक मेळटा. हांवें म्हजा काणकोण मतदारसंघात श्रमदान ही प्रणाली सुरू करपा फाटल्यान भाऊंचीच शिकवण आसा अशें तवडडकार हांणी स्पश्ट केलें. दरेका नागरिकांक ताच्या- तिच्या गांवाचा वा शाराची सामाजीक उदरगत करपाक योगदान दिवपा खातीर ही शिकवण उर्बां दिता अशें तांणे सांगलें. भाऊ गोंयांतल्या गावांगावांनी फिरून थंयच्या लोकां वांगडा उलोवन तांच्या समस्या आनी कागाळी आयकून घेताले. सद्याच्या राजकारण्याची हेंच करपाची गरज आसा अशेंय तवडकार हांणे सांगलें. ज्योती बांदेकार हिणे आपल्या बापायचेर पुस्तक बरयल्ले खातीर तिची तुस्त करतना तवडकार हाणे गोंयचे फुडले पिळगे उर्बां आनी प्रेरणा मेळपा खातीर भाऊचेर अजून बरेंच कितें बरोवपाची गरज आसा अशें सांगलें.
नामनेचे साहित्यीक प्रा. सोमनाथ कोमरपंत कार्यावळीक मानाचे सोयरे म्हणून हाजीर आशिल्ले. ज्योती बांदेकार हिणे पुस्तक बरयल्ले खातीर तिका शाबासकी दितना भाऊ विशीं इतल्या नेमकेपणान आनी संक्षिप्तपणान बरोवप ही एक कला आसा आनी बांदेकार हिका ती बरे तरेन जमल्या अशें तांणी सांगलें. “भाऊ आठवांचा पारिजात” ह्या पुस्तकांत भाऊ विशींच्या जायत्या ल्हान ल्हान यादींक लागून भाऊ विशींच्यो आपल्या मनांत ल्हानपणान सावन आशिल्लो योदी परत जाग्यो जाल्यो अशें कोमरपंत हांणी सांगलें.
पुस्तक बरोवन म्हज्या बापायचें रीण हांवे मात्शें फारीक केला अशें म्हाका दिसता अशे ज्योती बांदेकार हिणे पुस्तकाचे सान प्रस्तावनेत म्हणलां. ज्योती हिणे सांगल्ले प्रमाण शाळेंत शिकतना ताणे बरयल्ल्यो कविता आनी लेखाची भाऊ सदांच तोखणाय करतालो. ही खोशयेच्या यादींक लागून पुस्तक बरोवपाची प्रेरणा मेळ्ळी अशें तिणे म्हणला. पुस्तक प्रकाशन कार्यावळीक गोंयचे राजकारण, उद्देग आनी सामाजीक मळावयले मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
