भांगरभूंय | प्रतिनिधी
कोंकणी ही गोड भाशा आसा. ही आमची मायभास, देखून नवीन पिळगेन ही भाशा शिकून घेवपाक उमेद दाखोवपाक जाय, अशें मत कोशकार दामोदर घाणेकार हांणी उक्तायलें. दोनापावलाच्या अवर लेडी ऑफ द रोझरी शाळेंत मुखेल सोयरे म्हूण कोंकणी कार्यशाळेचें उक्तावण करताना ते उलयताले.
ह्या वेळार शाळेची मुख्याध्यापिका सिस्टर आंतोनेता कुलासो आनी पर्यवेक्षक सिबल रॉड्रिग्स उपस्थित आशिल्ली.
कोंकणी भाशेचो इतिहास सातव्या शेंकड्या इतलो पोरणो आसा, अशें सांगून शणै गोंयबाबान कोंकणी खातीर घेतिल्ले कश्ट, श्रवणबेळगोळांत मेळिल्ले कोंकणी भाशेंतले शिलालेख हांची म्हायती घाणेकार हांणी विद्यार्थ्यांक दिली.
कोंकणी भाशा आतां आठवे वळेंरेंत आसा. तशेंच संसारीक पावंड्याचेर कोंकणीच्या विद्यार्थ्यांक साबार संदी उपलब्ध आसात. प्रसार माध्यमां, अणकार, पर्यटन, अभिनय, आनी हेर क्षेत्रांत कोंकणीच्या विद्यार्थ्यां खातीर मागणी आसा. देखून भुरग्यांनी तिचो चडान चड लाव घेवचो, अशें मुख्याध्यापिका सिस्टर कुलासो हांणी सांगलें.
अवर लेडी ऑफ द रोझरी हायस्कूल, दोना पावला आनी गोवा कोंकणी अकादेमी हांच्या जोडपालवान शाळेंत कोंकणी व्याकरण, रचना आनी शुद्धलेखनाचे नेम ह्या विशयांचेर विद्यार्थ्यां खातीर एका दिसाची कार्यशाळा घडोवन हाडली. पूनम बुर्ये, रुपेश लिंगडकार आनी दामोदर घाणेकार हांणी हे कार्यशाळेंत विद्यार्थ्यांक मार्गदर्शन केलें. निया गांवस आनी अक्षरा भोसले ह्या विद्यार्थिनींनी ह्या कार्यशाळेचें सूत्रसंचालन केलें. शिक्षिका मुमताज बेग हांणी सोयऱ्यांची वळख करुन दिली. डिलायला फर्नांडिस हिणें उपकार मानले. हे कार्यशाळेचें आयोजन सिबल रॉड्रिग्स, डॅफोडिल डायस, मॅक्सिमियाना दा कॉस्ता आनी वेदिका जोशी हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
