भांगरभूंय | प्रतिनिधी
म्हापशें: शेळ सडयें- शिवोले गायेची हत्या केल्ल्या प्रकरणांत म्हापशें पुलिसांनी दुबावीत अथानास लकडा (30) आनी मनबताल इक्का (20) हांकां अटक केल्या. दोगूय दुबावीत मूळ छत्तीसगडांतले. ते शेळ सडयां रावताले.
हो प्रकार 8 मार्चाक सांजेचीं 7 ते 9 मार्चाक सकाळीं 10 वरां मदीं घडिल्लो. शुक्रारा सकाळीं हो प्रकार उजवाडाक आयिल्लो. राजेंद्र उर्फ राजेश मोरजकार हांणी ह्या प्रकरणांत पुलिशेंत कागाळ दाखल केल्ली. म्हापशें पुलीस आनी थळाव्या लोक दुबावितांच्या मागार आशिल्ले.
वाड्या वयल्या एके सीसीटीव्हींत बिरेस्तारा फांतोडेर दोग जाण घडणूक थळा वयल्यान वतना बंदिस्त जाल्ले. शेनवारा 11 मार्चाक सांजे उसरां वयल्या दुबावितांक दुबावा वयल्यान थळाव्यान धरले आनी तांकां बरेच बडयले उपरांत पुलिशेचे सुवादीन दिले.
फिर्यादीन दिल्ले म्हायती प्रमाण ताच्या घरा लागसारचे मेकळे सुवातेंत धा वर्साची गांय, देड आनी एका वर्साचें वासरूं अशीं तीन गोरवां बांदिल्लीं. तातूंतली एक गाय आनी एक वासरू गायब जाल्लें. उपरांत गायेचे कापिल्ले अवस्थेंतले कांय अवयव सांपडिल्ले.
दुबावितांनी ही गोहत्या करून गोमांस खंयतरी पुरलां आसतलें, असो दुबाव पुलिशेक आसा. घडणुकेचे सुवाते वयल्यान पुलिसांनी एक चॉपर चाकू जप्त केला. गाय आनी वासरू बांदिल्ले सुवाते वयल्यान 100 मिटर अंतरा वयल्या शेतांत पुलिसांक हे हत्यार तशेंच गायेची तकली मेळ्ळ्या. ती तकली आपलेच गायेची आशिल्ल्याची वळख फिर्यादीन पटयल्या.
ह्या प्रकरणांत गोहत्या आनी वासराची चोरी केल्ल्याच्या आरोपा खाला तशेंच जानावरां क्रुरता प्रतिबंधक कायद्याच्या कलमा खाला म्हापशें पुलिसांनी गुन्यांव नोंद करून वयल्या दुबावितांक अटक केली. फुडलो तपास पुलीस उपनिरिक्षक सुनील पाटील करता.
गोहत्या केल्ल्याची दुबावितांची कबुली
दोनूय दुबावीत फिर्यादीच्या शेजाराक भाड्याक रावताले. फाटल्या देड वर्सा सावन ते गोंयांत रावतात आनी मजुरूचें काम करतात. दुबावीत अथानास लकडा हो लग्न जाला जाल्यार दुबावी मनबताल आंकवार आसा. दुबावितांनी मुळावे चवकशे वेळार गायेची हत्या केल्ल्याची कबुली दिल्या. ही हत्त्या कित्या खातीर केली हाचें कारण फुडले चवकशे वेळार स्पश्ट जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
