भांगरभूंय | प्रतिनिधी
संजय बर्डेः मनीसपणाचे नदरेन गृहमंत्र्यान दखल घेवपाची मागणी
भांगरभूंय । प्रतिनिधी
पेडणें: मोपा आंतरराष्ट्रीय विमानतळ वाठारांत नवें पुलीस स्टेशन उबारलां. ह्या पुलीस स्टेशनांत 24 वरां सेवा दिवपी पुलिसांक हिसपा भायर त्रास सोंसचे पडटात, पूण ते केन्नाच हाची जाणीव दुसऱ्यांक जावपाक दिनात. ह्या वाठारांत सगळेच कडेन धुल्लाचें साम्राज्य पातळ्ळां. जेवतना दिसपट्टो कितलोसोच धुल्ल तांच्या पोटांत वता. पत्र्याचे शेडींत गरमेच्या दिसांनी रावप म्हणल्यार एके तरेची ख्यास्तूच. गृहमंत्री ह्या नात्यान मुख्यमंत्री डॉ, प्रमोद सावंत हांणी एक दीस ह्या पुलीस स्टेशनाक भेट दिवन थंयचे त्रास अणभवचे, अशें समाज वावुरपी संजय बर्डे हांणी थळाव्या पत्रकारां कडेन उलयतना सांगलें.
मोपा विमानतळाचें काम अर्दवट आसतना सरकारान ताकतिकेन विमानतळाचें उक्तावण केलें. तेचवरी पुलीस स्टेशनाची इमारत पुराय जावचे आदींच पत्र्याची शेड उबारून तातूंत पुलीस स्टेशन सुरू केलें. विमानतळाचें इतले ताकतिकेन उक्तावण करून सरकाराक कितें मेळोवपाचें आशिल्लें, असो प्रस्न बर्डे हांणी उपस्थीत केला. मोपा विमानतळाचेर जे पुलीस स्टेशन आसा तें म्हणल्यार गोरवांचो कोंडवाडो अशें दिसता. प्रवेश दारारूच व्हड प्रमाणांत धुल्लाचें राम्राज्य. ह्या धुल्ल्याक लागून दिसपट्टी कितलीसोच धुल्ल तांच्या पोटांत वता. ह्या धुल्ल्याक लागून दमो, खोकली हे दरेचीं दुयेंसां जावपाक शकता. पत्र्याचे शेडींत उबारिल्ल्या पुलीस स्टेशनांतले पंखेय वेवस्थीत चलना. ताका लागून ह्या पुलीस स्टेशनांत बसप म्हणल्यार भट्टेंत बशिल्ले वरी जाता. दिसान दीस गरमी वाडत आसा आनी पुलिसांचो कामाचोय ताण वाडटा. डॉ. सावंत हांणी मनीसपणाचे नदरेन ह्या गजालींची दखल घेवन ह्या पुलीस स्टेशनांत गरजेच्यो सुविधा तरी दिवच्यो आनी पुलीस स्टेशनाची इमारत ताकतिकेन पुराय करची, अशी मागणी बर्डे हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
