रामायणा जाग्यार….
भांगरभूंय | प्रतिनिधी
रेडियो चालू. हांव भायर कितें तरी करतालों. पयली कॅसेट- लव आनी कुश रामाल्या दरबारांत गीत रामायण गायतात. गावपी बाबुजी (सुधीर फडके). जालें, कॅसेट सुरू जाली आनी……
मार्च सोंपत आयलो तशी गर्मी भयंकर वाडपाक लागता आनी गांवांगांवांक आंगणांनी सुपार्यो सुकोवप चालू आसता. भुरग्यांक सुटयो पडपाचो आनी परिक्षा सोंपपाचो हो तेंप. आडांगीपणां चालू जातात. कोण फिरपाक, कोण मामागेर, कोण सोयर्यांगेर वतात. आमच्यो काजू तेन्ना भारार येतात. वत मोव जालें कांय काजूंक पासयेक वचप, सकाळीं बागांनी सुपार्यो नाल्ल पुंजावप आनी दनपरां जेवतगीर सुपारी सोलपाक बसप हीं ल्हानपणातलीं कामां…
बाबाक एक संवय आशिल्ली. सुपारी सोलतना पदां आयकुपाची. केन्ना विविध भारती, कोंकणी कार्यावळी, जयमाला आनी केन्नाय गीत रामायण. ताणें पदां लावप आनी आमी शेजराक बसून तीं आयकप. म्हाका तांचे बोल कळनाशिल्ले. एक पद गीत रामायणांतलें ‘स्वयंवर झाले सीतेचे’ तें हांव मोठ्यान ‘शंभर झाले सीतेचे, शंभर झाले सीतेचे‘ म्हूण घरभर नाचतालो आनी सगलीं घरचीं हांसतालीं. ‘माता न तू वैरीणीं’ हें पद लागलें काय आईक थोमणो मारप आनी बाबा कडल्यान प्रसाद खावप. अवचिन्नपणां खूब केलीं ल्हानपणांत.
म्हाका सादारण सातवेक आसतना इंग्लीश पदां आयकुपाची हुक्की आयिल्ली. आनी त्या प्रमाण हांव एफ. एम. लावपाचो यत्न करतालों. रातीं णव जालीं काय खरखरत रेनबो एफएमाचेर इंग्लीश पदां लागतालीं. एण्टिना वांकडो तिकडो करून आनी ताका चडावत वायरी लावन हांव एअर सप्लाय, बॉब मार्ले, बा, बॅकस्ट्रिट बोयज अशा कितल्याशाच विदेशी गायकांचीं पदां आयकतालों. बरीं पदां परत आयकन दिसल्यार तीं म्हयनो दोन म्हयने लागपच ना… उपाय किते?
म्हज्या आज्यालें एक लाकडाचें मेज आसा. ताका पांच गवेदां. दर गवेदांत कितें ना कितें भरिल्ले आशिल्लें. एका गवेदांत बाबाल्यो खूबश्यो कॅसेटी आशिल्ल्यो. तातूंत गीत रामायण, गीत महाभारत, थोड्यो मराठी, थोड्यो हिन्दी आशिल्ल्यो. मागीर कितें!! डिटॅक्टीव्ह धनंजय जावन हांव बाब भायर सरलों काय ते कॅसेटींत मेकळी कॅसेट सोदप. बाब वापरनाशिल्ली कॅसेट घेवन आपले कुडींत दवरप. ‘रातीस खेळ चाले’ ह्या नेमान हांव हळूच रेडियो चालू करप. एफ. एम स्टेशन चालू करप. एण्टिना वांकडो तिकडो करप. आनी मदेंच ब्रायन एडम्स् मोठ्यान पदेवप. एण्टिना धरपाच्या बोवाळांत आवज कमी करपाक विसरप आनी फाटल्यान बाबालो धेंगसो, ‘ओग्गी न्हिदपाक जायना रे?’ पाड पडलें… गाणीं खंयचीं घाणीं जालीं. न्हीद आतां. हळू भायर सगलें सामसूम जालें म्हणटगीर परत यत्न चालू.
एक दीस चूकून हांवें बाबाली गीत रामायणाची कॅसेट उबारली आनी लिपून ताचेर इंग्लीश पदां रेकॉर्ड केलीं. सुपारी सोलपाचो म्हयनो. गर्मी वाडिल्ली. दनपरां जेवन बाबा सुपारी सोलपाक बसलो. रेडियो चालू. हांव भायर कितें तरी करतालों. पयली कॅसेट- लव आनी कुश रामाल्या दरबारांत गीत रामायण गायतात. गावपी बाबुजी (सुधीर फडके). जालें, कॅसेट सुरू जाली आनी…… बाबूजीच्या जाग्यार अचकीत बॉब मार्लेन सुरू केलें, ‘नो वूमन नो क्राय…’… कर्मभोग…
बाबान वेळ केलो ना. हाताक बेत घेवन म्हजे भितर बॉब मार्ले हाडलो. परत केन्नाच हांवें ताच्या कॅसेटींक हात लायलो ना अशें समजनाकात. बाबाल्यो कितल्योश्योच गीत रामायणाच्यो कॅसेटी हांवें रिमिक्स केल्यो आनी ताचे खातीर वेगवेगळ्या मानेस्तां मुखार बाबान म्हाका पुरस्कार दिले.
सारंग अग्रासनी
9921868202
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
