भांगरभूंय | प्रतिनिधी
म्हापशें: बेतींतले मालीम नुस्तेमार जेटीचेर वजन आनी माप खात्यान नुस्तें विक्रेत्यां कडले 24 इलेक्ट्रॉनिक्स वजन काटे मशिनां जप्त केलीं. खात्यान अचकीत संयुक्त तपासणी करून ही कारवाय केली.
मालीम जेटीचेर नुस्त्यां विक्रेत्यां कडल्यान उण्या वजनान नुस्तें विकतात, अश्यो कागाळ वजन आनी माप खात्या कडेन एका गिरायकान केल्ली. ते प्रमाण शुक्रारा सकाळीं 7 वरांचेर खात्याच्या अधिकाऱ्यांनी ही तपासणी मोहीम हातांत घेतिल्ली.
ह्या वेळार पंगडान 44 नुस्तें विक्रेत्यां कडले इलेक्ट्रॉनीक वजन काटे मशिनांची तपासणी केली. तेन्ना 24 मशिनांनी फरक आशिल्ल्याचें दिसलें. ताका लागून ही सगळीं मशिनां परतून पडताळणी आनी मुद्रांका खातीर अधिकाऱ्यांनी जप्त करून ताब्यांत घेतलीं.
गिरायकांनी कसलीय वस्तू खरेदी करचे आदीं चड सादूर रावचें, असो उलो खात्या कडल्यान मारला. फुडारांत अशे तरेच्यो तपासणी मोहिमो हातांत घेतले, अशी म्हायती अधिकाऱ्यांनी दिली. खात्याचे उत्तर गोंय सहाय्यक नियंत्रक गुलाम गुलबर्ग हांच्या मार्गदर्शना खाला निरिक्षक सिद्धेश शिरगांवकार, राजेश वेंगुर्लेकार, आदित्य परब, केशवराज गोवेकार हांचे सयत कर्मचारी अरूण गांवस आनी महादेव धारगळकार ह्या पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
