म्हादय प्रस्नाचेर व्हड आंदोलन उबारतले

भांगरभूंय | प्रतिनिधी

अ‍ॅड. कार्लुस फेरेराः हाथ से हाथ जोडो मोहिमेची म्हापश्यां जागृती

भांगरभूंय । प्रतिनिधी

म्हापशें: काँग्रेस फुडारी राहुल गांधी हांणी भारत जोडो यात्रेंतल्यान देशाक जोडपाचो यत्न केलो. तातोच एक भाग म्हूण हाथ से हाथ जोडो मोहीम हातांत घेतल्या. फाटले विधानसभा वेंचणुकेंत भाजपाची मतदान टक्केवारी देंविल्ली, पूण विरोधक फुटिल्ल्यान भाजपाचें सरकार सत्तेर आयलें. कांय फुडारी वेंचणुके आदीं भाजपा फुडऱ्यांचेर टिका करताले, पूण तेच फुडारी आयज भाजपाच्या वॉशिंग मशिनांत न्हांवन नितळ जाल्यात, अशी टिका तांणी केली. म्हादय न्हंये संबंदांत काँग्रेस पक्षा वतीन खर आंदोलन उबारतले. काँग्रेस ह्या मुद्द्याचेर न्यायालयाची मजत घेतलो, अशें हळदोणेचे आमदार अ‍ॅड. कार्लुस फेरेरा हांणी सांगलें.

काँग्रेस पक्षा वतीन शेनवारा म्हापश्यां हाथ से हाथ जोडो मोहीम चालीक लायिल्ली. ह्या वेळार अ‍ॅड. फेरेरा उलयताले. म्हापशें मार्केटाच्या प्रवेश दारार तांणी पत्रकारां कडेन संवाद सादलो. ते उपरांत काँग्रेस कार्यकर्त्यांनी बाजार पेठेंत भोंवून हाथ से हाथ  जोडो तशेंच म्हारगाये विशीं जनजागृती करून पत्रकां वांटल्यो.

ह्या वेळार उत्तर गोंय जिल्होध्यक्ष विरेंद्र शिरोडकार, आदले सभापती शंभू भाऊ बांदेकार, गुरुदास नाटेकार, संजय बर्डे, विजय भिके, जॉन नाझारेथ, नगरसेवक सुधीर कांदोळकार, नगरसेवक अ‍ॅड. शशांक नार्वेंकार, नौशाद चौधरी, प्रतिक्षा खलप आनी हेर कार्यकर्ते हाजीर आशिल्ले.

अच्छे दिनाच्या नांवान भाजपान लोकांचें सूख काडून घेतलें. भाजपा सरकारांतल्या फुडाऱ्यांनी विरोधकां मदींच न्हय जाल्यार देशांत फूट घालपाचो यत्न चलयला, असो गंभीर आरोप हळदोणेचे आमदार अ‍ॅड. कार्लुस फेरेरा हांणी केलो.

‘खासदार फ्रान्सीस सार्दिनाक लक्ष्य करपाचो यत्न’

दक्षीण गोंयांत घडोवन हाडिल्ले एका कार्यावळीचो विशय कांय जाण गरजे भायर वाडोवपाचो यत्न करतात. खासदार फ्रांसीस सार्दिन हें बरें व्यक्तीमत्व. त्या विशयाचेर आपूण तांचे कडेन उलोवंक ना. जे मेरेन आपूण ताची बाजू आयकून घेना, आपल्याक त्या विशयाचेर उलोवपाक जावचें ना. सध्या लोकसभा वेंचणूक लागीं पावल्या. ताका लागून विरोधकां कडल्यान तांकां लक्ष्य करपाचो यत्न जाता आसतलो, असो दावो आमदार अ‍ॅड. कार्लुस फेरेरा हांणी केलो.