भांगरभूंय | प्रतिनिधी
युपी वॉरियर्सान रॉयल चॅलेंजर्स बंगळुरून दिल्ली 139 धांवड्यांची मोख 13 ओव्हरींनी एकूय विकेट वगडायनासतना मेळयली. ओपनर एलिसा हेलीन 47 बॉलांनी नाबाद 96 धांवड्यो केल्यो. हातूंत 18 चवक्यांचो आनी एका सक्याचो आस्पाव आशिल्लो. तिका देविका वैद्यान नाबाद 36 धांवड्यांची बरी साथ दिली.
बायलांचे प्रिमियर लिगेच्या ह्या हंगामांत रॉयल चॅलेंजर्स बंगळुरूची ही सेगीत चवथी हार थारली. मुळाव्या पांवड्याचेर दरेक पंगड आठ मॅची खेळटलो. बंगळुरून सुरवातीच्यो सेगीत चार मॅची वगडायल्यो. ह्या हारींक लागून तिचें प्ले ऑफांत सुवात मेळोवपाचें सपन भंगपाक शकता.
लीग पांवड्याचेर मुंबय इंडियन्सान तिनांतल्यो तिनूय मॅच जिखल्यात, युपी वॉरियर्सान तिनांतल्यो दोन मॅची जिखल्यात, दिल्ली कॅपिटल्सान तिनांतल्यो दोन जाल्यार गुजरात जायण्ट्सान तिनांतली एक मॅच जिखल्या. फकत रॉयल चॅलेंजर्स बंगळुरूकूच अजून मेरेन जैताचें खातें उगडपाक जमूंक ना. लिगेंतले पयले पंगड प्ले ऑफांत सुवात मेळयतले.
मोखीचो फाटलाव करपाक मैदानांत देंवपी युपी वॉरियर्सान जबरदस्त सुरवात केली. मुखेली एलिसा हेलीन पावर प्लेंत आक्रमक बॅटींग केली. तिका देविका वैद्यान बॉल टू रन करीत बरी साथ दिली. ह्या दोगांयनी पावर प्लेंत युपी वॉरियर्साक 55 धांवड्यां मेरेन मजल मारून दिली.
मजगतीं, पयलीं बॅटिंगेंत गडगडपी रॉयल चॅलेंजर्स बंगळुरूची बॉलींग लेगीत निष्प्रभ थारली. ताचो फायदो घेत हेलीन आपलो अर्द शेंकडो पुर्ण केलो. दुसरे वटेन वैद्य लेगीत बरी साथ दिताली. ह्या दोगांयनी आपली ही भागिदारी पळयता पळयता शंबरा मेरेन व्हेली. हातूंत हेलीचो व्हड वांटो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.