भांगरभूंय | प्रतिनिधी
कदंब म्हामंडळा वरवीं चलतल्यो खाजगी बशी
भांगरभूंय I प्रतिनिधी
पणजी : लुकसाण जावपी म्हामंडळां चलोवप हाचे फुडें सरकाराक परवडचे ना. सगल्या म्हामंडळांच्या अर्थीक स्थितीचो नियाळ घेवन लुकसाणींतलीं म्हामंडळां बंद जातलीं, अशें मुख्यमंत्री डॉ. प्रमोद सावंत हांणी सांगलें. ईडीसीन सरकाराक लाभांशाचो धनादेश दिले उपरांत मुख्यमंत्री उलयताले.
सगल्या म्हामंडळांच्या अर्थीक स्थितीचो नियाळ घेवपाची प्रक्रिया आतां सुरू जातली, अशें मुख्यमंत्र्यांन सांगलें.
अर्थीक उदरगत म्हामंडळ (ईडीसी) बरो वावर करता. म्हामंडळाचे अध्यक्ष सदानंद शेट तानावडे हांणी सरकाराक म्हामंडळाच्या लाभांशाचो धनादेश भेटयलो. मुख्यमंत्री डॉ. प्रमोद सावंत हांणी 86 लाख 20 हजार 260 रुपयांचो धनादेश मुख्यमंत्र्यान स्विकारलो.
ह्या वेळार ईडीसीचे वेवस्थापकी संचालक बी. एस. पै आंगले, ईडीसीचे उपाध्यक्ष संजय सातार्डेकार, जोड वेवस्थापकी संचालक बी. एस. बोरकार हाजीर आशिल्ले. सदानंद शेट तानावडे हांचे फुडारपणा खाला ईडीसी बरो वावर करता. ईडीसी नफ्यांत आसा. नफ्याचे वांटप लाभांशाच्या रुपांत ते सरकाराक दितात. ईडीसी जो नफो जोडटा, ताचो लाभांश ते सरकाराक दिता. येवजणा तशेंच प्रकल्पां खातीर सरकाराक रीण दितां. मुख्यमंत्री रोजगार येवजणेची (सीएमआरवाय) कार्यवाही ईडीसी वरवीं जाता. तशेंच सरकाराक जमीन संपादन करपाच्या कामांत ईडीसी मजत करता, अशें मुख्यमंत्र्यांन सांगलें.
कदंबा म्हामंडळाची फेररचणूक जावन ते नफ्यात हाडपाचे यत्न जातलें. सगल्यो खाजगी बशी कदंब म्हामंडळ ताब्यांत घेवन चलयतलें. हे खातीर येवजण सुरू केल्या. येरादारीची पुराय वेवस्था कदंबा म्हामंडळा कडेन आयले उपरांत म्हामंडळ लुकसाणींत चलचें ना. कदंब म्हामंडळ नफ्यांत हाडपा खातीर हेर उपक्रम सुरू जातले. खाजगी टॅक्सी चलोवपा खातीर लेगीत म्हामंडळ स्थापन करपाची सरकाराची तयारी आसा, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
