भांगरभूंय | प्रतिनिधी
दिवचल तशेंच हेर वाठारांतल्या भाविकांची गर्दी
भांगरभूंय । प्रतिनिधी
दिवचल: बोर्डें, दिवचलच्या देव श्री वडेश्वराच्या आंगणांत शिमगोत्सवा वेळार मनोवपी होमकूंड उत्सव बुधवारा उमेदीन मनयलो.
बोर्डें वाठारा सयत राज्यांतल्या हेर सुवातांवेल्या लोकांनी हांगा व्हडा प्रमाणांत गर्दी केल्ली. वडेश्वराच्या आंगणांत होमकूंड रचिल्लें. हे सुवातेर भाविकांनी दर्शन घेतलें. धोंडांच्या सोवळे व्रताक होळीच्या दिसा सावन सुरवात जाता. धोंडांनी उत्सवा दिसा ‘अग्निदिव्य’ केलें.
दिवचल तशेंच हेर वाठारांत शिमगोत्सवांत होमकूंड उत्सव लोकांक पळोवपाक मेळटा. बोर्डें दिवचलच्या होमकुंड उत्सवाक आतां व्हड स्वरूप मेळ्ळां. ही परंपरा तिगोवन दवरतना आयजूय व्हडा संख्येन तरणाटे धोंड ह्या उत्सवांत वांटेकार जातात.
धोंडांच्या सोवळ्या व्रताक होळयेक सावन सुरवात जाली. धोंडांचें व्हडलें जेवण जालें. होमकूंड उत्सवाच्या दिसा हे धोंड फकत फराळ खातात.
श्री देव वडेश्वराच्या आंगणांत होमकूंड रचून दवरिल्लें. सांजेच्या 7.30 वरांचेर सुमाराक देवीचो कळस वाजत नाचत वडेश्वराच्या पांयां कडेन हाडलो. रातच्या 12 वरांचेर देवीचो कळस आनी धोंड होमकुंडाक प्रदक्षिणा घालून गावतडी (व्हाळशी) हांगचे पवित्र झरीर न्हांवपाक वतात.
न्हांवन जाल्या उपरांत देवीच्या कळसाक न्हेंसोवन धोंड श्री वडेश्वर देवस्थाना लागसाराक येतात. उपरांत वाटेर मेळपी श्री सांतेरी, श्री महामाया, श्री रवळनाथ, श्रीवंत देवळी, चव्हाटा हांगचे ब्राह्मण ह्या देवतांक दर्शन दीत तशेंच व्हंटी भरतात. तो मेरेन सकाळीं 3 वरां जाल्लीं आसतात.
सुरवातेक धोंड आनी उपरांत कळस घेतिल्लो मोडपुरूष होमकुंडांतल्यान वतात. मागीर देवीचो सगळ्यांक कौलप्रसाद दिल्या उपरांत ह्या उत्सवाची सांगता जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
