भांगरभूंय | प्रतिनिधी
श्रीनिवास धेंपो: धेंपो उच्च माध्यमीक विद्यालयांत मनयलो संस्थापक दीस
पणजीः संवसार नेटान बदलत आसा तेच प्रमाण मनशान लेगीत बदलपाक जाय. वाचन हें खूब म्हत्वाचें. सोशल मिडीयाचेर वेळ फुकट घालोवचे परस दरेकल्यान वाचन करचें आनी दीस सोंपच्या पयलीं आपणाक कितें आवडटा तेंच करचें. तशेंच दर दिसा 1 ते 2 वरां वाचात, सैमावांगडा वेळ घालयात कारण सैम आमचें खातीर खूब म्हत्वाचो. जिज्ञासू जायात, प्रस्न विचारात, शिकप सोडूं नाकात, शिकत रावात. पालक आनी शिक्षक हांकां मान दियात. जें बरें तें घेयात आनी तुमकां जे आवडटा तेंच करात. तुमकां जें खबर आसा तें दुसर्यांक शिकयात. जेन्ना तुमी दुसर्यांक दितात तें सगळ्यांत व्हडलें समाधान. केन्नाच चुकांक भिवंनाकात. पूण दुर्लक्षय करूं नाकात. ताची कारणां सोदात आनी आपल्या चुकींतल्यान शिकात. जिणेंत पासियेंस बाळगात. सगळ्यांत गजालीनीं तज्ञ आसपाची गरज ना आनी निमाणें हेरांकडल्यान शिकात. दुसर्याकूय शिकयात आनी तुमच्या सपनां खातीर कश्ट करात अशें धेंपो ग्रूप ऑफ इंडस्ट्रीचे चॅरमॅन श्रीनिवास धेंपो हांणी सांगलें.
वसंतराव धेंपो उच्च माध्यमीक कला, विज्ञान आनी वाणिज्य विद्यालय, कुजिरा हांगा संस्थापक दिसा निमतान मुखेल सोयरे ह्या नात्यान धेंपो उलयताले. ह्या वेळार धेंपो चॅरीटी ट्रस्टाचे अध्यक्ष श्रीनिवास धेंपो, प्रशासक राजेश भाटीकार, सांतांक्रूजचे सरपंच जेनीफर द ऑलिवेरा, प्राचार्य सुरेखा केळकार आनी उपप्राचार्य मिनाक्षी मुदलियार हाजीर आशिल्लीं.
कार्यावळीची सुरवात प्रार्थना गीतान जाली. उपरांत सर्गेस्त वंसतराव धेंपो हांच्या फोटवाक फुलां ओंपून आर्गां दिली. उपरांत खेळामळार जोडिल्ल्या इनांमांचे वांटप अध्यक्ष श्रीनिवास धेंपो आनी हेर मानेस्ताचें हस्तुकी जालें. सांताक्रूझ गांवांत मॅरीटार आयिल्ल्या विद्यार्थ्यांक तशेंच धेंपो उच्च माध्यमीक विद्यालयांतल्यान शिकून जी विद्यार्थी उच्च शिक्षण घेतात तांकां सर्गेस्त वंसतराव धेंपो हांच्या नांवांन शिश्यवृत्ती भेटयल्यो.
मनशाक सहज अशें कांयच मेळना तर ताचे खातीर खूब कश्ट, संघर्श करचे पडटात. येस मेळोवपाक कश्ट करप खूब म्हत्वाचें. धेंपो चॅरीटी ट्रस्टाचे अध्यक्ष श्रीनिवास धेंपो हांकां शिश्यवृत्ती भेटयल्ले खातीर मनांकाळजांतल्यान उपकार. तशेंच ते आपल्या गांवचें एक व्हड उद्देजक आशिल्ल्यान आपणाक खूब अभिमान आसा अशें सांतांक्रूजचे सरपंच जेनीफर द ऑलिवेरा हिणें सांगलें.
कार्यावळीचें येवकाराचें उलोवप प्राचार्य सुरेखा केळकार हिणें केलें. सुत्रसंचालन शिक्षिका वनजा मुदलियार हिणें केलें आनी उपप्राचार्य मिनाक्षी मुदलियार हिणें उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
