भांगरभूंय | प्रतिनिधी
बायलां दीस कार्यावळीक कर्तृत्वान बायलांचो भोवमान
पणजी: सुशिक्षीत आनी कर्तृत्वान बायल मनीस कसल्याय आडखळींक समर्थपणान तोंड दिवपाक शकता, अशें मुख्यमंत्री डॉ. प्रमोद सावंत हांणी म्हणलें.
आंतरराष्ट्रीय बायलां दिसानिमतान राजभवनांतल्या नव्या दरबार हॉलांत आयोजीत कार्यावळींत मुख्यमंत्री डॉ. प्रमोद सावंत हांचे हस्तुकीं पुरस्कार भेटोवन गोंयच्या 40 कर्तृत्वान बायलांचो भोवमान केलो. ह्या वेळार उलयतना मुख्यमंत्र्यान सावंत हांणी पुरस्कार जैतिवंत बायलांक परबीं भेटोवन बायलांनी आपल्या कर्तृत्वान स्वताची उदरगत करपा वांगडाच समाजाचे उदरगतीक योगदान दिवपाचो उलो मारलो.
संस्कारीत समाज घडोवपा खातीर मातांनी आपल्या भुरग्यांचेर बरे संस्कार करपाची गरज आसा, जेणे करून अन्याय-अत्याचारमुक्त समाज निर्माण जातलो. बायलांनी आपले भलायकेचीय काळजी घेवपाक जाय, अशेंय तांणी सांगलें.
आमदार जेनिफर मोन्सेरात आनी आमदार डॉ. देविया राणे हांचेंय ह्या वेळार भाशण जालें.
समाजकल्याण संचालक संध्या कामत हांणी साबार सरकारी येवजण्यांची म्हायती दिली. अर्ज संस्थेच्यो ज्युलियाना लोहार हांणी लिंगीक शोशणाक बळी पडिल्ल्या बायलांचे पुनर्वसन, संरक्षण आनी न्याय ह्या विशयाचेर विचार मांडले.
सल्लागार आनी मानसोपचार तज्ञ डॉ. कल्पना गोवेकार हांणी बायलांच्या मानसीक भलायकेचेर भाशण केलें. पुलीस अधीक्षक सुनीता सावंत हांणी महिला सशक्तिकरण आनी लिंगीक समानताय ह्या विशयाचेर विचार मांडले. जिम्नॅस्ट सोनिया आरोंदेंकार स्वसंरक्षण आनी फिटनेस हे विशीं मार्गदर्शन केलें. बँक ऑफ बडोदाच्यो प्रतिनिधी जिग्यासा हांणी बायलांच्या हिताच्या विवीध येवजण्यांची म्हायती दिली.
सुरवातेक राधिका प्रभू देसाय हांणी मानेस्तांक येवकार दिलो. नियोजन, सांख्यीकी आनी मुल्यमापन खात्याचे संचालक विजय सक्सेना आनी बँक ऑफ बडोडाचे वेवस्थापक राजेश कुमार झा ह्या वेळार हाजीर आशिल्ले.
कन्या रुपेश नायक हांणी गणेश वंदना म्हणली. कार्तीक ग्रुपान सांस्कृतीक कार्यावळ सादर केली. करुणा सातार्डेंकार हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
