भांगरभूंय | प्रतिनिधी
मनीस दीसभर कामांत उरतात, देखून व्यायामाक वेळ मेळना अशीं निमतां करून जायते जाण व्यायाम टाळटात. पूण, हाचेर प्रत्येकान विचार करचो पडटलो. दर दिसा 11 मिनटां सवकासायेन व्यायाम केल्यार मरण येवपाचो धोको उणो जाता. ब्रिटनाच्या कॅंब्रिज विद्यापिठान 196 जाणांच्या अभ्यासाच्या आंकड्यांचेर आदारून हो निश्कर्श काडला.
हें संशोधन ब्रिटीश जर्नल ऑफ स्पोर्ट्स मेडिसीनांत उजवाडाक आयलें. तशेंच सप्तकांतल्यान उण्यांत उणें 150 मिनटां वा दिसांतल्यान 22 मिनटां व्यायाम करपाची शिफारस संशोधक करतात. हाका लागून खंयच्याय दुयेंसाक लागून मरण येवपाचो धोको 31% उणो जाता. काळजाच्या दुयेंसाक लागून मरण येवपाचो धोको 29% उणो जाता जाल्यार कॅन्सराक लागून मरण येवपाचो धोको 15% उणो जाता. काळजाच्या दुयेंसांचो धोको 27% आनी कॅन्सराचो धोको 12% उणो करता. पूण ह्या अभ्यासा प्रमाण दिसपट्ट्या 11 मिनटांचो व्यायाम केल्यार बेगीन मरण येवपाचो धोको 23% उणो जाता. 11 मिनटां व्यायाम केल्यार 10 मदल्या एका मनशाक मरण येवपाक आडावंक मेळटा.
हाचे भायर रोगप्रतिकार शक्त वाडोवपाक, रगतदाब, कोलेस्टेरॉल हांचे मदीं समतोल दवरपाकय ताचो फायदो जाता. चड शारिरीक क्रियाशीलताय काळजाचे दुयेंस, कॅन्सर आनी अकाली मरण येवपाचो धोको उणो जावपाक सरळ संबंदीत आसता. कांय संवयीं बदलल्यार तुमची कूड सक्रिय दवरूं येता. क्वीन्स युनिव्हर्सिटी बेलफास्टाची लिआंड्रो गार्सिया हांच्या मतान आमी व्यायामाक खेळ खेळप वा धांवप अशें मानतात. पूण जायते फावटीं कांय संवयो बदलप गरजेचें आसता. जशें गाडये बदलाक पांयान वा सायकलीन ऑफिसांत वचप वा भुरग्यां वांगडा खेळप. तेन्ना दरेकल्यान आयज सावन व्यायामाक सुरवात करची. ते खातीर जिमांत वचपाकूच जाय, नाजाल्यार ताका व्यायाम म्हणिनात, हो गैरसमज मनांतल्यान काडून उडोवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
