भांगरभूंय | प्रतिनिधी
बायलांचे प्रिमियर लिगेंत (डब्यूपीएल) मुंबय इंडियन्सान दिल्ली कॅपिटल्साक 8 विकेटींनी हारयलो. दिल्लीन दिल्ली 106 धांवड्यांची मोख मुंबय इंडियन्सान 15 ओव्हरींनी मेळयली.
मुंबय इंडियन्साचें हें सेगीत तिसरें जैत थारलें. यास्तिका भाटियान सगल्यांत चड 41 धांवड्यो केल्यो.
हरमनप्रीत कौराच्या फुडारपणाखाला खेळपी मुंबय इंडियन्सान तिनूय मॅची जिखून गुणतकट्यांतली पयली सुवात आनीक घटमूट केली.
मुंबय इंडियन्साचो दादल्यांचो पंगड हो कायम सुरवातीक हारता आनी अखेरच्या मॅचींनी सेगीत जैतां जोडून प्ले ऑफाची सुवात निश्चीत करता. पूण, बायलांच्या पंगडान हाच्या उरफाटें केलें.
दिल्ली कॅपिटल्सान जैता खातीर दिल्ले 106 धांवड्यांचो फाटलाव करतना मुंबय इंडियन्साक यास्तिका भाटिया आनी हेली मॅथ्यूज हांणी जबरदस्त सुरवात करून दिली. ह्या दोगांयनी मुंबय इंडियन्साक पावर प्लेंत 47 धांवड्यां मेरेन व्हेलो. सेट जाल्ले यास्तिका भाटियान आक्रमक बॅटींग करीत 32 बॉलांनी 41 धांवड्यो केल्यो. मुंबयक 9वे ओव्हरींत 65 धांवड्यांनी पावयली. पूण, यास्तिका बाद जाल्या उपरांत मुंबयची धांवगती उणावली. तातूंत हेली मॅथ्यू 31 बॉलांनी 32 धांवड्यो करून बाद जाली. ते उपरांत नॅट सिव्हर ब्रंट आनी मुखेली हरमनप्रीत कौर हांणी डावाची सुत्रां आपल्या हातांत घेतली.
दिल्ली कॅपिटल्सान बरी बॉलींग आनी फिल्डींग करून मुंबयचें जैत कठीण करपाचो यत्न केलो. पूण, हरमन आनी ब्रंट हांणी 15वे ओव्हरींत मुंबय इंडियन्साक जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
