भांगरभूंय | प्रतिनिधी
मनोज परबः जोडबसका आपोवपाची मागणी
भांगरभूंय । प्रतिनिधी
कोरगांवः सध्या पुराय गोंयांत उदकाचो उणाव जाणवपाक लागला. उदका खातीर वळवळे काडपी पेडणें म्हालांतले गांव सध्या दुश्काळ पिडेस्तांची जीण जगतात. ‘हर घर जल’ म्हूण सरकार टँकरांतल्यान उदका पुरवण करतात अशें भासयतालें, पूण प्रत्यक्षांत हें उदक लोकांची तान भागोवचे सुवातेर ल्हान- व्हड प्रकल्पांक पावयतात, असो दुबाव रिव्होल्युशनरी गोवन्सचे (आरजी) मुखेली मनोज परब हांणी उक्तायला.
दोन दिसां आदींच पेडणेंच्या कोरगांव, उगवें गांवांतलो उदकाचो प्रस्न परब हांणी लावन धरला. परब हांणी पेडणेंच्या उदक फिल्टर करपी युनिटाची स्थिती दाखयिल्ली. राज्य सरकार गोंयांतल्या लोकांचे भलायके कडेन खेळटा, हें दाखोवन दिल्लें.
बिरेस्तारा परतून एकदां आरजीन पेडणें म्हालांतल्या भौशीक बांदकाम खात्याचे सहाय्यक अभियंत्यांची भेट घेतली. 15 एमएलडीचो नवो प्रकल्प येतलो आनी उपरांत उदकाचो प्रस्न सुटावो जातलो, अशी म्हायती सहाय्यक अभियंत्यान परब हांकां दिली. हे भेटी वेळार आरजीन कोरगांव, उगवें आनी हेर चार गांवांतल्या लोकांनी सयो केल्लें निवेदन संबंदीत सहाय्यक अभियंत्याक भेटयलें.
पेडणें म्हालांत नव्यान येवपी बांदकाम प्रकल्पांक नळाचें कनेक्शन दिवचें न्हय. नगर नियोजन कात्याक लेगीत ही गजाल कळोवची, अशी विनवणी परब हांणी केली. गांवांतल्या वेवस्थापनाचेर थळावें पंचायत मंडळ, उदका पुरवण खातें तशेंच भौशीक बांदकाम खात्याची जोड बसका घेवची मागणी हे भेटी वेळार परब हांणी केली. मतदारसंघांत प्रशासना कडल्यान जावपी खदूळ उदका पुरवणेचे नमुने घेवन ताची चाचणी करची, जंय जंय उदकाचे सैमीक स्त्रोत आसात तांचो सोद घेवन त्या उदकाचेर ल्हान ल्हान उदक पुरवण करपा सारके युनीट बसोवचे आनी ते संबंदांत जनजागृती करची, जे वरवीं सध्या आशिल्ली उदकाची गरज कितली आनी फुडारांत फुडल्या 10 वर्सांत कितलें उदक लागतलें, ह्या सगळ्या गजालींचेर चर्चा करचे आरजी वतीन बसका आपोवपाची मागणी केल्या, अशें परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
