भांगरभूंय | प्रतिनिधी
पर्यटन खात्या कडल्यान सुदारीत तारीख जाहीर
म्हापशें: म्हापश्यां शिगमोत्सव मिरवणूक आयतार 12 मार्चाक आयोजीत करपाची सुदारीत तारखेचो आदेश पर्यटन खात्यान बुधवारा जारी केला. ताका लागून म्हापश्यां आनी पर्वरे एकाच दिसा शिगमोत्सव मिरवणूक जातली.
पयलीं पर्यटन खात्यान म्हापशेंची शिगमोत्सव मिरवणुकेची तारीख सोमार 13 मार्चा दिसा जाहीर केल्ली. हे तारखेक म्हापशेंच्या कांय जागृत नागरिकांनी आक्षेप घेतिल्लो. आदले नगरसेवक तुषार टोपले, नारायण राटवड, मगोचे एकनाथ म्हापशेंकार, काँग्रेसीचे संजय बर्डे आनी समाजसेवक राजू तेली तशेंच हेरांनी उपसभापती ज्योशुआ डिसोझा, भाजप प्रदेशाध्यक्ष सदानंद शेट तानावडे आनी मुख्यमंत्री डॉ. प्रमोद सावंत हांची भेट घेवन म्हापशें शारांतल्या शिगमोत्सवाची तारीख बदलपाची मागणी केल्ली.
म्हापशें शारांत फाटल्या 40 वर्सां सावन शिगमोत्सव मिरवणूक आयताराच जाता. तशेंच म्हापशें सावनूच ह्या मिरवणुकेची म्हूर्तमेढ रोयल्या. तशेंच सोमार 13 वेर खोर्ली हांगासरल्या सांतेरी देवीचो गुलालोत्सव आसा, असो दावो ह्या नागरिकांनी करून मिरवणुकेची तारीख बदलून आयतारा करची अशी मागणी केल्ली. ते प्रमाण सरकारान तारीख बदलून म्हापशेंकारांची मागणी मान्य केल्या.
मजगतीं, बुधवारा सांजवेळा म्हापशें शिगमोत्सव समितीन पत्रकार परिशद घेवन सुदारीत तारखे विशीं म्हायती दिली. शारांतल्या जागरूक नागरिकांनी फुडाकार घेवन ही तारीख बदलून घेतली, मागीर तुमकां कित्याक जमलें ना ह्या प्रस्नाचेर आमचो शिश्टमंडळाक तेंको आशिल्लोच. तशेंच मुख्यमंत्र्या कडेन गेल्ले हे सगले म्हापशेंकारूच आशिल्ले अशी जाप दिवन समितीच्या पदाधिकाऱ्यांनी वेळ मारून व्हेली. तशेंच समितीन जागरूक नागरिकांच्या शिश्टमंडळाच्या यत्ना खातीर उपकारूय मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
