दिव्यांगत्वाचेर जैत जोडिल्ले प्रिती श्रीनिवासन हांचो येसस्वी प्रवास

भांगरभूंय | प्रतिनिधी

पणजीः शिक्षणांत दोळे दिपकावपी कामगिरी करून एक राष्ट्रीय जलतरण खेळगडी आनी राज्य क्रिकेट खेळगडी म्हूण हालींच वयर सरतनाच पुड्डुचेरींत एका विचित्र अपघातांत तिका दिव्यांग केली. ते उपरांत सुरू जाल्ले संकश्टांचे सांखळेन तिची जीण वाजोवणी केली…. उपरांत खूबशा चडटे- देंवतेंक फुडो करून ती आयज येसस्वी थारल्या…. ही गजाल प्रिती श्रीनिवासन हांची.

पिरायेच्या 18 व्या वर्सा जाल्ल्या अपघातांत प्रितीक आरीचो आताक आयलो आनी माने सकयली कुड बधीर जाली. हे स्थितीक कसो फुडो करचो, हाची मातूय समज, जाणीव तेन्ना आपल्याक नाशिल्ली. ही परिस्थिती आपले खातीर योग्य ना, असोच विचार एकसारको मनांत येतालो. पूण ल्हवू ल्हवू सरभोंवतणची परिस्थितीच आपल्याक शिकोवपाक लागली. तातूंतल्यानूच उपरांत पुराय स्विकार, मोग आनी परिस्थितीक फुडो करपाची आपली मानसिकता तयार जायत गेली. ताका लागून जिणेचो फुडलो दरेक खूण हो चमत्कार आसा आनी हो चमत्कार अणभवपा खातीर आपल्याक आशिर्वाद मेळ्ळा, हें मनांत चडांत चड घट जायत गेलें, अशें प्रिती हांणी आपले ते काळे उगडास परतून ताजे करतना सांगलें.

जिवाचेर आयिल्ल्या अशा दोन घडणुकांक फुडो करून लेगीत ध्यास आनी जिद्दीच्या नेटार संकश्टांचेर जैत जोडिल्ली प्रिती सांगता, खंयच्या तरी व्हड उद्देशा खातिरूच आपूण स्वताक जिवीत दवरपाक शकल्या…. समाजाच्या एका वर्गाचें, जांकां कसलेंच समाजीक अस्तित्व नाशिल्लें सारकें आसा आनी जाका कसलोच चेरो वा आवाज ना, अशा वर्गाचें प्रतिनिधीत्व करप, हो तो उद्देश.

2013त दोन दिव्यांग चलयांक वीख पिवयलें ही खबर जेन्ना कळ्ळी तेन्ना ही समस्या खुबूच गंभीर आनी व्यापक आशिल्ल्याची जाणीव जाली. भारता सारकिल्ल्या व्हड लोकसंख्या आशिल्ल्या देशांत शारिरीक नदरेन सक्षम आशिल्ल्या बायलांक लेगीत न्याया खातीर समाजांत संघर्श करचो पडटा, थंय दिव्यांग बायलांक मानान जगपाक कितलो व्हड लडो दिवचो पडटलो हाची गंभीरता समजपाक लागली, प्रितीन सांगलें.

आरीच्या आताकान दिव्यांग जाल्ल्यां खातीर बदल घडोवचे खातीर तिच्या घरच्यांनी आनी इश्ट परिवारान तांकां उर्बा दिली. पूण प्रिती स्वताच पुराय तरेन आपली आवय आनी भायर पडिल्ले बापूय (जांणी आपले चलयेची देखभाल करचे खातीर नोकरी सोडिल्ली) तांचेर निंबून आशिल्ली. ताका लागून ह्या वावरा खातीर फुडें सरपाक सुरवेक तिचें मन तयार नाशिल्लें.

आवय विजयालक्ष्मी श्रीनिवासन हांचे वांगडा प्रितीन समाजांतल्या दिव्यांगाचें पुनर्वसण करप, तांकां मुख्य समाज प्रवाहांत हाडप आनी मानान जगचे खातीर संद दिवप, ह्या उद्देशान सोलफ्री हे संस्थेची चेन्नय- तामीळनाडूंत स्थापना केली.

जिवितांतलो दरेक खीण हो व्हड ध्यासान आनी पुराय तरेन जगचो हो व्हड उद्देश देवान आपल्याक दिला, अशी आपली धारणा आसा, अशें प्रिती हांणी सांगलें.

चड करून बायलांक उणाक, वायट वागणूक दितात. दिव्यांगांक जाल्यार समाजीक लजेचें कारण आनी समाजाचें वजें अशेंच मानतात. ही मानसिकता बदलपाची गरज आसा. हें खत पुसून उडोवपा खातीर गरजेचे बदल पयलीं स्वता मदल्यान (बायलांच्या) भितरल्यान येवपाक जाय. येवपी आव्हानांक भिये नासतना नेमान फुडें वचपाक जाय, अशें प्रिती सांगता.

20 हजार चौखण फुटाचेर उबें राविल्लें हें सोरफ्री इन्स्पायर सेंटर हें भारतांतलें पयलें अत्याधुनीक आनी एकात्मीक अशें फाटींच्या कण्या विशींच्या समस्यांचेर उपचार करपाचें पुनर्वसन केंद्र थारलां. फाटींच्या कण्यां विशींच्या समस्यां संबंदांत सर्वसमावेशक उपचार वेवस्थापन करपी संशोधन केंद्र तशेंच सेंटर ऑफ एक्सलन्स करपाचें उदिश्ट प्रिती हांणी बाळगिलां. परंपरीक वैजकी प्रणालीचो उपेग करून तशेंच उपचाराच्या विवीध पद्दतींची जोड दिवन आमी खूब व्हड काम हातांत घेतलां, अशें प्रिती सांगता. आपल्या ह्या म्हणण्याक आदार दिवचे खातीर तिरुवनमलई ह्या ल्हानशा, देवळांच्या शारांत उबारिल्ल्या सोलफ्री इन्स्पायर सेंटराच्या माध्यमांतल्यान नवें जिवीत मेळिल्ल्या, जियेवपाची नवी उमेद मेळिल्ल्या खूबशा जाणांच्या यशोगाथांच्यो देखी प्रिती दिता. अशा लोकां खातीर शारिरीक, मानसीक तशेंच समाजीक आनी अर्थीक गजालींनी स्वावलंबन, आत्मनिर्भरता हाडचे खातीर ती काम करता. आयज मेरेन 100 परस अदीक लोकांचें पुनर्वसन ह्या केंद्रांतल्यान केलां.

90 टक्के कुडीचें अपंगूळपण आसून लेगीत आयआटींत पीएचडी खातीर प्रवेश घेवपी पयली बायल अशीय प्रिती हांची वळख जाल्या. भारतांतल्या शारिरीक अपंगूळ आशिल्ल्या बायलांच्या लड्याचो हो प्रवास सोलफ्रींतल्या आपल्या वावरांतल्यान समाजा वांगडा जावपी आपल्या संवांदांतल्यान आनीक स्पश्ट जातलो, असो प्रिती हांणी विस्वास उक्तायलो. आमचे विशीं समाजाक म्हायती मेळची हे खातीर आपूण वावुरतली. दरेक बदल घडोवचे खातीर एक कीट पुरो जाता. ती कीट पेटोवपाचें काम आपूण  करतली, असो आत्मविस्वास प्रिती हांणी उक्तायलो.

11 मार्चाक प्रिती श्रीनिवासनाक आमंत्रण

पर्वरेच्या संजय स्कुला वतीन महिला दिसा निमतान 11 मार्चाक आयोजीत केल्ले कार्यावळींत प्रिती श्रीनिवासन हांकां आमंत्रीत केल्या. ह्या वेळार आपलो जिवनप्रवास, शारिरीक अपंगूळ बायलांची यशोगाथ सादर  करून बायलांचें सक्षमीकरण करपाचें काम ती गोंयकारां मुखार सादर करतली.