भांगरभूंय | प्रतिनिधी
भांगरभूंय । प्रतिनिधी
दिवचलः कुटूंबीक हिंसाचार ही एक व्हड समस्या जाल्ली आसा. बायलांनी ताका विरोध करून आपल्या अधिकारां विशीं जाग्रुत रावपाक जाय अशें अॅड गीता सावंत ऊर्फ निधी वेरेकार हिणे सांगलें. दिवचल तालुको वाचपघऱांत आयोजीत केल्ल्या आंतरराष्ट्रीय बायल दिसाचे कार्यावळींत ती मुखेल सोयरी म्हणून उलयताली.
कार्यावळींत तिणे बायलांचे अधिकार आनी बायल हक्क कायद्या विशीं खोलायेन म्हायती दिली. सध्या देशांत दरेका मळार बायलो वावुरताना दिसतात. तांका न्याय आनी उर्बां दिवपा खातीर दर वर्सा बायल दीस मनयतात. सध्याची बायल स्वतंत्र विचारांची आसा. ती आतां अबला उरूंक ना, स्वताच्या पांयार उबें रावपाची धमक तिचे मदीं आसा अशें ग्रंथपाल प्रभारी तेजा परब हिणे सांगलें.
सगल्यांत पयलीं वाचपघऱाची कर्मचारी प्रतिमा धामसेकारान फुलां तुरो भेटोवन गीता सांवत हिका येवकार दिलो. कार्यावळींत वेगवेगळ्या मळार वावुरपी बायलांची हाजेरी आशिल्ली. निवृत्त शिक्षिका सुगंधा अडकोणकारान आपल्या संघर्शाच्या जिणे प्रवासाची ह्या वेळार म्हायती दिली. बायल लेखिकांची पुस्तकां आनी कर्तबगार बायलांचेर बरयल्ल्या पुस्तकांचें प्रदर्शन मांडलें.
सूत्रसंचालन करतना प्रगती पेडणेकारान सांगलें की वाचपघऱांत बायलांनी बरयल्ले जायती पुस्तकां आसात. बायलांनी आपले लिखणीन साहित्य मळ समृद्ध केल्लें आसा. अस्मिता भिडेन निमाणे सगल्यांचे उपकार मानतना बायलांनी वाचपघरांत येवंन वाचनाचो लाब घेवचो अशें मागलें. बायलांचें समाजांतले योगदान हे विशींची कांय कविता तिणे सांदर केल्यो. कार्यावळ येसस्वी करपा खातीर ग्रंथपाल मंगलदास घाडी आनी हेर कर्मचारी वावुरले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
