भांगरभूंय | प्रतिनिधी
भांगरभूंय । प्रतिनिधी
फोंडेंः कसलये- उसगांव हांगा सरकारी प्राथमीक शाळेच्या आवाठांत मोबायल टॉवर उबारपाचें काम सुरू केल्ल्यान लोकांनी आनी पालकांनी ताका विरोध करून भुरग्यांक घेवंन रस्त्यार बसून आंदोलनाक सुरवात केल्या. मोबायल टॉवर हेर कडेन उबारपाचें आस्वासन मेळ मेरेन भुरग्यांक शाळेत धाडचे ना. तशेंच नव्या शिक्षणीक वर्सा सावन तांकां हेर शाळेंत धाडपाची शिटकावणी पालकांनी दिल्या.
शाळे लागीं मोबायल टॉवराक विरोध करपी जायती निवेंदना पालकांनी शिक्षण खात्याक दिल्लीं. ताचेर विचार करनास्तना अकस्मात मोबायल टॉवर उबारपाचे काम सुरू केल्ल्यान पालकांनी भुरग्यांक शाळेंत धाडप ना अशें थारावन शाळेचे गेटीकडेन रस्त्यार बसून आंदोलनाक सुरवात केली. लोकांनी तांतूंत वांटो घेवन तांका तेंको दिलो. कसलये शाळेंत पूर्व प्राथमीक वर्गांत 12 जाल्यार पयली ते चवथी मेरेन 38 आनी आंगणवाडींत 40 भुरगीं आसात.
पालक- शिक्षक संघाचो अध्यक्ष राजेंद्र गावडेन शाळे लागीं टॉवर उबारपाक विरोध केला. तो हेर कडेन उबारचो अशें तांचे म्हणणे आसा. व्हो टॉवर हेर कडेन उबारचो अशी मागणी पालक फाटल्या कांय म्हयन्यां सावन करतात. टॉवर उबारल्यार फुडल्या शिक्षणीक वर्सा सावन पालक आपल्या भुरग्यांक हेर शाळांनी घालतले ही शिटकावणी शिक्षण खात्यान गंभीरपणान घेवची अशें गावडे हांणे सांगलां.
पालकांक शाळे लांगीं टॉवर आयिल्लो नाका जाल्यार सरकारी यंत्रणेन तो थंय उबारपाक कशी मंजुरी दिली. अकस्मात टॉवराचें काम कशें सुरू जालें असो प्रश्न निलिमा गोवेकार हिणे विचारला. टॉवराच्या रेडियेशनाक लागून भुरग्यांत ताचे आशी-कुशीक फिरप धोक्याचें जातलें अशें तिणे सांगलें.
भुरग्यांक शिक्षपाक सुवात कमी पडटा. तांचे खातीर वर्ग बांदपाची गरज आसतना आसा ते सुवातेंत टॉवर उबारपाचें काम सुरू जालां. सरकाराक भुरग्यां परस टॉवराचें चड पडून गेलां काय किदें अशें उल्हास गावडेन विचारलां. टॉवराक लागून भुरग्यांचे भलायकेचेर परिणाम जावपाची शक्यताय आसा. सरकारान व्हो टॉवर हेर कडेन उबारपाक सांगचें अशें तांणे मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
