भांगरभूंय | प्रतिनिधी
अश्टतासांची खेळगडी हेली मॅथ्यूजाच्या प्रदर्शनाच्या नेटार मुंबय इंडियन्सान बायलांचे प्रिमियर लिगेंत सेगीत दुसऱ्या जैताची नोंद केली. मुंबय इंडियन्सान ब्रेबोर्न स्टेडियमाचेर जाल्ले मॅचींत मुंबय इंडियन्सान रॉयल चॅलेंजर्स बंगळुरूक 9 विकेटींनी हारयलो.
टॉस जिखून पयलीं करतना रॉयल चॅलेंजर्स बंगळुरून 18.4 ओव्हरींनी सगल्यो विकेटी वगडावन 155 धांवड्यो केल्यो.
156 धांवड्यांचो फाटलाव करतना मुंबय इंडियन्सान एक विकेट वगडावन मोख मेळयली. मॅथ्यूजान नॅटली सिव्हरान दुसरे विकेटी खातीर नाबाद 114 धांवड्यांची भागिदारी करून 14.2 ओव्हरींनी आपल्या पंगडाक जैत मेळोवन दिलें.
मजगतीं, स्मृती मंधाना आनी सोफी डिव्हायन हांणी रॉयल चॅलेंजर्स बंगळुरूक बरी सुरवात करून दिली. तांणी 4.2 ओव्हरींनी 39 धांवड्यो केल्यो. ते उपरांत हरमनप्रीतान स्पिरनांक आक्रमणाक हाडले. आनी तिचो हो निर्णय योग्य थारलो. स्पिनरांनी चार धांवड्यांनी चार विकेटी घेतल्यो. अशे तरेन बिनबाद वयल्यान रॉयल चॅलेंजर्स बंगळुरूची अवस्था 4 बाद 43 अशी जाली.
रिषा घोष आनी पेरी ही जोडी बंगळुरूचो डाव सांबाळटना दिसली. तांकां दोन खेपे धांवबाद करपाची संद मुंबय इंडियन्सान वगडायली. पूण, फुडले ओव्हरींत पेरी (13) धांवड्यांचेर धांवबाद जाली. 71चेर पांचवी विकेट पडली. कनिका अहुजान अनपेक्षीत आक्रमक बॅटींग करून बंगळुरूची धांवगती वाडयली. कनिका 13 बॉलांनी 22 धांवड्यो करून कॅच बाद जाली. मॅथ्यूज परतून बॉलींग घालपाक आयली आनी तिणें रिचाक 28 धांवड्यांचेर बाद केली.
श्रेयांका पाटील आनी मेगन शूट हांणी अखेरच्या ओव्हरींनी उत्कृश्ट खेळ केलो. दोगांयनी 20 बॉलांनी 34 धांवड्यो केल्यो. ही जोडी शिव्हर ब्रंट हिणें फोडली. श्रेयांका 15 बॉलांनी 23 धांवड्यो केल्यो. एलेनिया केरान 2 विकेट घेत बंगळुरूचो डाव 155चेर सोंपयलो.
मोखीचो फाटलाव करपी मुंबय इंडियन्साक यास्तिका भाटिया आनी हेली मॅथ्यूज हे जोडयेन बरी सुरवात करून दिली. पूण, प्रिती बोसान पयली विकेटी घेतली. यास्तिका 23 धांवड्यो करून बाद जाली. हे एके विकेटीचेर बंगळुरूक समाधान मानचें पडलें.
ते उपरांत मॅथ्यूज आनी शिव्हर ब्रंट हांणी दुसरे विकेटी खातीर 9.2 ओव्हरींनी 114 धांवड्यांची भागिदारी करून पंगडाक 14.2 ओव्हरींनी जैत मेळोवन दिलें. मॅथ्यूजान 38 बॉलांनी 13 चवके आनी एक सक्याच्या नेटार नाबाद 77 धांवड्यो केल्यो. शिव्हर ब्रंटान 29 बॉलांनी 9 चवके आनी एक सक्याचे मजतीन 55 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
