भांगरभूंय | प्रतिनिधी
रान खात्याच्या अधिकाऱ्यांची म्हायती; कोट्यांनी रुपयांचें लुकसाण
भांगरभूंय । प्रतिनिधी
वाळपयः तीन दिसां सावन भगभगपी साट्रे दीपाजी राणे गड दोंगरा वयलो उजो कांय प्रमाणांत नियंत्रणांत आयला. तरी लेगीत उजो पालोवपाचें काम झुजा पांवड्यार चालू आसा. तातूंत रान खात्याची यंत्रणा व्हड प्रमाणांत तैनात केल्या. रान खात्याच्या अधिकाऱ्या कडल्यान मेळिल्ले म्हायती प्रमाण रातीं उसरां मेरेन पुराय उजो नियंत्रणांत येवपाची शक्यताय आसा. मात पारवड कर्नाटका वटेंतल्या उज्याचो लोट परतून ह्या दोंगरा वटेन येता, ताका लागून परतून उज्याक नेट मेळपाची शक्यताय आसा.
हे संबंदांत विशेश जतनाय घेतल्या. रान खात्याचो कर्मचारी पंगड त्या वाठारांत तैनात केला. रातीं उसरां मेरेन तो पंगड थंय काम करतलो. कर्नाटकांतल्या पारवड वाठारांतल्यान उज्याचो लोट गोंयांत येवचो न्हय हे खातीर पुराय जतनाय घेतल्या, अशें अधिकाऱ्यांनी स्पश्ट केलें.
सोमारा 6 मार्चाक सत्तरी म्हालाचे उपजिल्होधिकारी प्रवीण परब, मामलेदार दशरथ गांवस, उजो पालोवपी दळाचे अधिकारी हांणी जोडरितीन साट्रे गांवांत भेट दिवन हे संबंदांत पळोवणी केली आनी नियाळ घेतलो. हो अहवाल जिल्होधिकाऱ्यांक सादर केला. जिल्होधिकाऱ्यान हाची गंभीर दखल घेतल्या आनी तांणी लेगीत सांजे उसरां गांवांत येवन परिस्थितीची पळोवणी केली. हो उजो पुराय तरेन नियंत्रणांत येवचो हे संबंदांतले निर्देश तांणी रान खात्याचे यंत्रणेक दिले.
थळाव्या लोकांनी दिल्ले म्हायती प्रमाण तीन दिसा सावन भगभगपी उज्या फाटलें कारण स्पश्ट जावंक ना. हो उजो कोणेतरी मुद्दाम घातला, असो तांचो आरोप आसा. सुरवेक हो उजो उण्या प्रमाणांत पेट्टालो, मात दुसऱ्या दिसा उज्यान आनीक नेट घेतलो आनी पुराय दोंगराचेर पातळ्ळो. ह्या उज्यांत व्हड प्रमाणांत काडू बागायती, तशेंच रान संपत्तीचें लुकसाण जालां, अशें थळाव्या लोकांनी सांगलें.
सत्तरी म्हालाचो हो वाठार पश्चीम घांटाचो गिरेस्त इतिहास सांगपी वाठार. तातूंत खूबशीं वखदीं आनी दुर्मीळ झाडांचो आस्पाव आसा. मेळिल्ले म्हायती प्रमाण सुमार 10 किलोमिटर अंतरा भितरलीं झाडांचो ह्या उज्यांत लासून गोबर जाला. हाचो वायट परिणाम रानवटी जनावरांचेरूय जावपाची शक्यताय आसा. ह्या रानांत पट्याचो वाग, रानदुकर, चितळ, हरण, गवे, वाश्वेसां व्हड प्रमाणांत रावतात. खूब खेपे तीं लोकांचे नदरेक पडल्यांत. मात हे दुर्घटणेक लागून तीं दुसरे सुवातेर वचपाची शक्यताय आसा. जनावरा वरींच ह्या वाठारांत दुर्मीळ सुकणीं वावुरतालीं. ह्या उज्याच्या धगांत तातूंतलीं खूबशीं सुकणीं मरपाची शक्यताय आसा.
उजो नियंत्रणांत, मात धोको कायम
साट्रे दोंगरा वयलो उजो सुमार 90 टक्के पालयला. पूण कर्नाटकांतल्या पारवड वाठारांत उज्याचो लोट परतून पेटला. ताका लागून तो उजो परतून साट्रे दोंगराचेर पावपाची शक्यताय आसा. साट्रे दोंगराचेर 50 परस अदीक कर्मचारी तैनात केल्यात. जिवाची पर्वा करिनासतना ते उजो पालोवपाचो यत्न करतात. तांकां थळाव्या लोकांचोय बरो आदार मेळटा, अशें रान अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
