भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापश्यांत रवींद्र भवना बांदपाक आपणे प्राधान्य दिलां. कुचेली-म्हापश्यांत कोमुनिदाद जमीन रवीद्र भवना खातीर जाय तशी आसा. कोमुनिदादीन थाराव घेवन जाय ते सोपस्कार पुराय करून सरकाराक धाडटगीर रवींद्र भवनाच्या कामांक नेट येतलो, अशें कला आनी संस्कृती मत्री गोविंद गावडे हांणे सांगलें. सोमाराक गावडे हाणे उपसभापती आनी म्हापशेंचो आमदार जोशुआ डिसोझा, नगराध्यक्ष प्रिया मिशाळ, कुचेली कोमुनिदाद अध्यक्ष शिवानंद धावजेकार, अॅटर्नी मयकल कारास्को हाच्या वांगडा कुचेली हांगचे नियोजीत जमनीची पळोवणी केली.
नव्या अर्थीक वर्सांत कला आनी संस्कृती खातें बार्देस आनी पेडणे तालुक्यांत रवींद्र भवन बांदपाक प्राधान्य दितलें. कुचेलीचे सुवाते लागींच म्हामार्ग आशिल्ल्यान येरादारीचे नदरेन रवीद्र भवना खातीर ती जाय तशी आसा अशें गावडेन सांगलें. म्हापशेकार रवींद्र भवनाची वाट पळयत आसात. कुचेली कोमुनिदादीन सुवात दिवपाची तयारी दाखयल्या. रवींद्र भवन उबारप हें म्हज्या बापायचे ख्रि. फ्रान्सिस सार्दिन हाचें सपन आशिल्लें, अशें उपसभापती जोशुआ डिसोझान सांगलें.
म्हापशें शारांत रवींद्र भवन उबारपा खातीर आमी आराखडो तयार करून खर्चाचो अदमास तयार केला. मात सुवातेंत आशिल्ल्या कुळांनी आमका एनओसी दिली ना. कुचेली कोमुनिदादीन फुडाकार घेवन तांची जमीन दिवपाची तयारी दाखयली. ह्या रवींद्र भवना खातीर 40 हजार चोखण मीटर सुवात जाय. कुचेली कोमुनिदादीची जमीन 18 तें 20 हजार चौखण मीटर आसा. तातूंत आमी रवींद्र भवन बांदून बार्देशकारांचे सपन पुराय करतले अशें गोविंद गावडेन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
