भांगरभूंय | प्रतिनिधी
बंदखण म्हानिरिक्षकांची धाड; चार्जर, हेडफोन, ब्ल्यू टूथ जप्त
भांगरभूंय । प्रतिनिधी
म्हापशें: बंदखण म्हानिरिक्षक ओमवीर सिंग बिश्नोई हांणी पुलिशेचे मजतीन कोलवाळ बंदखणींत धाड घातली आनी झडटी घेतली. ह्या धाड सत्रांत 8 मोबायल आनी मोबायलाचें साहित्य जप्त केलें. हे कारवायेक लागून बंदखणींत परतून एकदां कैद्यां कडल्यान मेकळेपणान मोबायलाचो वापर केल्ल्याचें उजवाडाक आयलां.
ही धाड आयतारा दनपारां 1.30 वरांच्या सुमाराक घातली. बंदखण म्हानिरिक्षक बिश्नोई हांणी कोलवाळ पुलीस निरिक्षक सोमनाथ माजीक आनी पुलीस पंगडाच्या आदारान बंदखणींत ही धाड घातली.
ह्या वेळार म्हानिरिक्षक आनी पुलीस पंगडान बंदखणींतल्या कैद्यांच्या सगळ्या विभागांची झडटी घेतली. तेन्ना बंदखणींत आठ मोबायल फोन तशेंच चार्जर, हेडफोन आनी ब्ल्यू टूथ तशेंच प्रतिबंध आशिल्लें साहित्य सांपडलें. पुलिसांनी उपरांत हें सगळें साहित्य जप्त केलें.
पुलीस म्हानिरिक्षक बिश्नोई हांचे कडेन हालींच सरकारान बंदखण म्हानिरिक्षक पदाची अतिरिक्त जापसालदारकी दिल्या. तांणी आपलो ताबो घेताच बंदखणीची झडटी घेतली. हे आदीं तांणी चंदीगडांत बंदखण म्हानिरिक्षक म्हूण जापसालदारकी सांबाळ्ळ्या. कोलवाळ बंदखणींतल्या ह्या वायट अणभवा वयल्यान सुरक्षा यंत्रणा आनी वेवस्थापनाच्या एकंदरीत कारभाराचेर तांणी तिडक उक्तायली. अशे तरेच्यो बेकायदो गजाली हे फुडें बंदखणींत दिसपाक जायना. जर त्यो दिसल्यो जाल्यार योग्य कारवाय करतले. संबंदीत यंत्रणांनी वेळावेळार बंदखणींत भेट दिवन पळोवणी करची आनी अशा बेकायदो गजालींचेर आळाबंद हाडचो. तशेंच कर्मचारी वर्गान अशा गजालींनी वांटो घेवचो न्हय, ना जाल्यार खर कारवाय करतले, अशे निर्देश बंदखण म्हानिरिक्षकान कर्मचारी तशेंच बंदखण प्रशासनाक दिल्यात.
बंदखणींतलें सोकपीट भरलां उपाट
बंदखणींतलें सोकपीट उपाट भरलां. हें घाणयारें उदक बंदखणींत उक्ताडार पातळ्ळां. तें मुख्य गेटी मेरेन पावलां आनी थंय घाणीचें साम्राज्य पाताळ्ळां. ह्या घाणयाऱ्या वातावरणांत कर्मचारी वर्गाक सेवा दिवची पडटा. कोलवाळ भलायकी केंद्रान ह्या प्रकाराची पळोवणी केल्या, पूण अजून बंदखण प्रशासनान ताचेर उपाय काडूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
