भांगरभूंय | प्रतिनिधी
डॉ. जयंती नायक: डॉ. पांडुरंग फळदेसाय हांच्या ’कोंकणी लोकगीतां’ संग्रहाचें जालें लोकार्पण
पणजी: गोंयचे लोकसंस्कृतायेचो मोलादीक खजिनो म्हळ्यार हे मातयेंतल्यान आयिल्लीं लोकगीतां. ज्येश्ठ संशोधक डॉ. पांडुरंग फळदेसाय हांणी साहित्य अकादेमी वरवीं ’कोंकणी लोकगीतां’ हो सुमार पांचशें परस चड लोकगीतांचो संग्रह शास्त्रीय स्वरुपांत उजवाडाक हाडून फुडले पिळगे खातीर व्हड योगदान दिलां. अशे तरेचो हो पयलोच अभ्यासपूर्ण असो लोकगीतांचो संग्रह आसा, अशें सांगून लोकवेद संशोधक डॉ. जयंती नायक ह्या ग्रंथाचें लोकार्पण केल्या उपरांत मनोगत उक्तायलें.
काळाप्रमाण बदल जावप हो खंयचेय लोककलेचो सभाव. देखून लोकसंस्कृतायेच्या इतिहासाचे नदरेन अश्या मोलादीक ग्रंथांचे म्हत्व आसता, अशें डॉ. जयंती नायक हांणी फुडें सांगलें.
डॉ. पांडुरंग फळदेसाय हांणी फाटल्या पन्नास वर्सां सावन एकठांय केल्ल्या गोंय आनी कोंकणी लोकगीतांच्या संग्रहाचें लोकार्पण पर्वरीच्या थॉमस स्टीफन्स कोंकणी केंद्राच्या सभाघरांत लोक कलाकार आमेलिया डायस, गणेश वेळीप काणकार आनी अभ्यासक कॅल्वीन मोंतेरो हांचे हस्तुकी आयोजीत केल्ले कार्यावळींत जालें. ह्या वेळार ज्येश्ठ लोकवेद अभ्यासक कमलाकर म्हाळशी, साहित्य अकादमीचे बसकेचे वांगडी डॉ. पूर्णानंद च्यारी आनी लेखक डॉ. पांडुरंग फळदेसाय माचयेर हाजजीर आशिल्ले.
कमलाकर म्हाळशी हांणी ’कोंकणी लोकगीतां’ ह्या ग्रंथाचो अभ्यास करून व्यापक नियाळ केलो. सद्याच्या लोकगीत संग्रहांचे तुळेंत हो लोकगीतांचो संग्रह खूब सविस्तर आनी शास्त्रीय रितीन उजवाडाक आयलां अशें सांगून ताणीं ह्या पुस्तकांतल्यो जायत्यो सुंदरश्यो सुवातो उक्तेपणान सांगल्यो. असो संग्रह उजवाडाक येवप हें फुडले पिळगे खातीर बरी गजाल. हातुंतल्यान परंपरीक संगीत प्रकारांची योग्य तरेन निर्मिती जावपाक तांचो म्हत्वाचो वांटो आसा अशें डॉ. पुर्णानंद च्यारी हांणी सांगलें.
सुरवेक डॉ. फळदेसाय हांणी आपल्या येवकाराच्या भाशणांत म्हणलें, म्हाविद्यालय आनी विद्यापिठां कडेन संबंदीत शिक्षक आनी विद्यार्थ्यांच्या नदरेमुखार दवरून हो संग्रह तयार केला. पुराय कार्यावळींचें सुत्रसंचालन श्रेया फळदेसाय हिणें केलें. निमाणें नीता शिवानंद फळदेसाय हांणी उपकार मानले. तशेंच मुखेल कार्यावळीक जोडून गणेश वेळीप काणकार हांच्या गुडुल्या गायनांतलें नमन, महेंद्र फळदेसाय आनी वांगडी हांचें सुंवारीवादन, आमेलिया डायस हांच्या पंगडाचो कुंणबी नाच आनी सुभ्रदा गांवस आनी तांची चली जानकी परब हांच्या पंगडाचीं लोकगीतां, धालो आनी फुगडी अश्यो कार्यावळी जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
