भांगरभूंय | प्रतिनिधी
काल जाल्ले बायलांचे प्रिमियर लिगेचे दुसरे मॅचींत युपी वॉरियर्सान गुजरात जायण्ट्साक तीन विकेटींनी हारयलो. युपी वॉरियर्साक निमाण्या 18 बॉलांनी 33 धांवड्यांची गरज आशिल्ली. युपीची बॅटर ग्रेस हॅरिसान आक्रमक खेळी करून आपल्या पंगडाक जैत मेळोवन दिलें. तिणें 26 बॉलांनी नाबाद 59 धांवड्यो केल्यो. गुजराताचे किम गार्थ हिणें 5 विकेटी घेतल्यो.
हॅरिसान अखेरेक सोफी अॅक्लेस्टन (नाबाद 22) हिच्या वांगडा नाबाद 71 धांवड्यांची भागिदारी केली. ह्या दोगां खेरीत किरण नवगिरेन 53 धांवड्यो केल्यो.
ते पयलीं टॉस जिखून पयलीं बॅटींग करपी गुजरातान निर्धारीत 20 ओव्हरींनी 6 विकेटी वगडावन 169 धांवड्यो केल्यो. ताची सुरवात बरी जाली. एस मेघना आनी सोफिया डंकले हांणी पयले विकेटी खातीर 34 धांवड्यांची भागिदारी केली. सोफियान 24 धांवड्यो करून चवथे ओव्हरींत आनी मेघनान 13 धांवड्यो करून पांचवे ओव्हरींत विकेट वगडायली. अॅनाबेल सदरलॅण्ड आनी सुखमा वर्मा हांकां व्हड खेळी करपाक जमली ना. सदरलॅण्ड आठवे आनी सुषमा 11वे ओव्हरींत बाद जाली. पूण, हरलीन देओलान एक बाजू सांबाळून धरली. अॅशले गार्डनरा वांगडा मेळून तिणें पांचवे विकेटी खातीर 44 धांवड्यांची भागिदारी करून पंगडाचो स्कोर 100 वयर व्हेलो. गार्डनर अखेरेक 16वे ओव्हरींत बाद जाली. ते उपरांत हरलीन हिणें दयालन हेमलता वांगडा मेळून सवे विकेटी खातीर 22 धांवड्यांची भागिदारी केली. ते उपरांत हरलीन 18वे ओव्हरींत बाद जाली. तिणें 32 बॉलांनी सात चवक्यांचे मजतीन 46 धांवड्यो केल्यो. मुखेली स्नेह राणा आनी हेमलता हांणी सातवे विकेटी खातीर 27 धांवड्यांची नाबाद भागिदारी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
