भांगरभूंय | प्रतिनिधी
आमच्या देशान आपल्या गळ्यांत परबांची माळ घाल्या अशें म्हणल्यार अतिताय जावची ना. हांगाचे हिंदू लोक सगल्योच ल्हान- व्हड परबो मनयतात आनी आपली खोशी उक्तायतात. चवथ, रामनम, दसरो, दिवाळी, संवसार पाडवो अशो असंख्य परबो भारतीय हिंदू मनयतात.
ह्या परबां भितर होळी एक रंगयाळी परब. ही परब जगभर प्रसिद्ध आसा. होळी फाल्गुनाचे पुनवेच्या आदल्या दिसा म्हणजे चतुर्दशीक मनयतात. होळी म्हणजे थंडेच्या दिसांनी आपल्याक ऊष्णता दिवपी अग्नीदेवाक केल्लें नमन. धर्मीक परबो मनोवपा फाटल्यान आमच्यो पौराणीक कथा आसतात. एक आख्यायिका सांगतात, ती अशी.
दैत्यांच्या राजान हिरण्यकश्पून आपले प्रजेक देवाचें नांव घेवपाक जायना, अशें सांगिल्लें. पूण ताच्या पुतान ताची आज्ञा मानली ना. तो देवभक्त आशिल्लो. बापायन ताका खूप समजावन पळयलो. पूण प्रल्हादान ताचें आयकलें ना. ताणें पुताक मारपाचे खूप यत्न केले. पूण प्रल्हाद मेलो ना. “देव तारी ताका कोण मारी?” हिरण्यकश्पूक होलिका नांवाची भयण आशिल्ली. तिका उज्या पासून भंय नाशिल्लो. ती केन्नाच उज्यांत जळची ना असो तिका वर प्राप्त जाल्लो. तिणे प्रल्हादाक मांडयेर बसोवन आपूण उज्यांत बसली. पूण तिणे देवान दिल्ल्या वरदानाचो वायट उपेग केल्ले खातीर ती जळून मेली. पूण प्रल्हादाक कांयच जालें ना.
ह्या दिसाची याद म्हणून होळी जाळटात. शेणयो, लाकडां, बडयो, शेतांतलें सुकें तण हांची रास करून जमिल्ले लोक ताका उजो लायतात. तातूंत नाल्ल अर्पण करतात आनी भोंवतणी प्रदक्षिणा घालून पदां बी म्हणटात. ” होळी रे होळी पुरणाची पोळी ” अशें म्हणून आड्डतात. वाड्यावाड्यार सामुहीक होळी जाळटात. वायट तें जळटा आनी बऱ्याचो विजय जाता, असो लोकांचो भावार्थ. तसोच सत्याचो असत्याचेर विजय जाता असोय समज.
सगले लोक खूश आसतात आनी हे खोशयेंत दुसऱ्या दिसा रंगपंचमीची भर पडटा. ह्या दिसा सगले एकामेकांक रंग लायतात. भुरगीं पिचकारींनी रंगीत उदक शिंवरायतात. सगले कडेन खोशयेचें वातावरण पसरता. मागीर सगले घरा वचून पुरण-पोळयेच्या जेवणाचेर ताव मारतात.
ही रंगपंचम एकामेकां मदीं मोग वाडयता. पयलींचें कितेंय वायटपण, झगडीं -झुजां, वाद- तंटे आसल्यार, लोक तें सगलें विसरून वचून एकामेकांक रंग लायतात. पयसुल्ले लोक एकामेकांक मेळटात, गजाली करतात आनी मोगाचो परमळ सगल्याक पसरायतात. ही परब म्हळ्यार एकतेचें प्रतीक. दायजी- दुस्मानांक एकटांय हाडटा. शेतकरी भावय नव्या पिका खातीर खूश आसतात. हांगा जात, धर्म आड येना. गरीब-गिरेस्त, ल्हान व्हड एकठांय येतात आनी हे परबेचो आनंद लुटतात. अशी ही रंगरंगयाळी, खोशयेची, मोगाची आनी एकतेची परब. फक्त लोकांनी एकच ध्यानांत दवरचें कीं वायटाचें दहन केलां त्या खातीर सोरो बी पियेवपाचें वायट काम करचें न्हय. एकामेकांक रंग बी लायतना कृत्रीम रंगांचो वापर चड करचो न्हय आनी रंग लायतना पुराय जतनाय घेवची .
अनघा विठूकृष्ण कामत
8408084270.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
