भांगरभूंय | प्रतिनिधी
सध्याच्या काळांत पर्यावरण हो खूप गंभीर आनी चर्चेचो विशय थारलां. पर्यावरणात जावपी मानवी हस्तक्षेप मनश्याच्या मुळार येवपाक लागलां. जागतीक तापमान वाढ, देंवत चलिल्ले भुंयगर्भांतलें उदक, प्रदुशण, भूंयस्खलन, दर्याचे पातळेंत जावपी वाढ ह्यो कांय गजालीं पर्यावरणाचो वाडत चलिल्लो इबाड अधोरेखीत करता. फकत उद्देगीक वा विकास कामांच्या प्रकल्पां खातीर पर्यावरण इबाडत चल्लां अश्यांतलो भाग न्ही. केन्ना केन्ना चुकीचे पद्धतीन मनयिल्ले आमचे सण, उत्सव आमकां नकळटां पर्यावरणाक आनी पर्यायान आमकां बादीकार जावंक लागल्यात.
रंगांचो उत्सव म्हणजेच होलिकोत्सव सामको हुंबऱ्यार पावला. गोंयांत होळी (एकामेकांक रंग लावप) हावजींग सोसायटी ते भौवशीक पांवड्यार मंडळां वरवी सगळी कडेन मनयतात. बाजारांत उपलब्ध आशिल्ले रासायनीक रंग वापरून भुरगें ते जाण्टे सगले होळी खेळतात. हे रासायनीक रंग घातक पदार्थ वापरून केल्ले आसता. हे पदार्थ आमचे भलायकेक मारक आसताच. शिवाय ते पर्यावरण पुरक नाशिल्ल्यान सैमाकय घातक थारतात. बाजारांतल्या मानव निर्मीत रंगांत लिड ऑक्सायड, कॉपर सल्फेट, अँल्युमिनीयम ब्रोमायड, क्रोमीयम आयोडायड मर्क्युरी सल्फायड सारकें रासायनीक पदार्थ आसतात. ही रसायनां मनश्याचे कातीक, दोळ्यांक इन्फेक्शनां जावपाक करणीभूत आसतात. तशेंच श्वसनाचे विकारय ह्या पदार्थांच्या संपर्कांत येत जाल्यार जावंक शकतात. प्रुशीयन ब्लू आनी जेंशीयन व्हायलेट सारकें पदार्थ डोळ्यांत गेले जाल्यार
तात्पुरते कुड्डेपणा सारकी गंभीर दुखापत हे रंग वापरतना जांवू शकतात. कॅन्सर, कातीचीं दुयेंसा सारक्यो पीडा उप्रासू शकतात.
हे रासायनीक रंग सोंपेंपणांत उदकांत विरघळनात आनी सैमांत आस्पावनात. म्हणतकच विघटन जाय नासतना तशेंच उरतात आनी उदकाचें प्रदुशण करता. जाका लागून पिकाळ माती इबाडटा, उतका स्रोत पिड्ड्यार जाता आनी पर्यावरणाक मारक थारता.
रासायनीक रंगांचें हें लुकसाण सोंपोंवपाक आसगांवच्या ज्ञानप्रसारक महाविद्यालयाच्या विद्यार्थ्यांनी पर्यावरण पूरक अशें ऑरगॅनीक होळी रंग तयार केल्यात. ह्या प्रकल्पाक गोंय राज्य प्रदुशण नियंत्रण मंडळ आनी गोंय राज्य जैव विविधताय बोर्डाचे सहकार्य लाबलां. पर्यावरण शास्त्राचे फक्त पुस्तकी गिन्यान न्हय तर ताचो प्रत्यक्ष वापर करून कुशळतायेन विद्यार्थ्यांनी हे सेंद्रीय रंग तयार करून सर्व सामान्य जनते मेरेन पावोवपाचें थारायलां.
“महाविद्यालय म्हणून आमचें काम फकत शिकोवपा पुरते मर्यादित न्हय तर आमच्यो कांय सामाजीक जबाबदाऱ्यो आसात. ऑरगॅनीक होळी रंग तयार करप, पावसाच्या उदकाचो योग्य पुनर्वापर जावपाक प्रकल्प उबारप हो महाविद्यायाच्या सामजीक जाबाबदारीचो भाग” अशें प्राचार्य प्रो. आरोलकर हांचे मत. पोरूं वर्सा प्रायोगिक तत्त्वाचेर निर्मिल्ले हे रंग अंदूं वेवसायिक प्रमाणांत विद्यार्थ्यांनी तयार केल्यात. 100 प्रतिशें सैमीक पदर्था पासून तयार केल्लें हे रंग पर्यावरण तशेच मानवी भालायकी पुरक आसात. तांतून कसल्याच घातक रसायनांचो वापर करूंक ना. मक्याचे पीठ, हळद, फुलांचो पिठो, पानांचो द्रव्य सारकें थेट निसर्गीक पदार्थ हातूंत वापरल्यात. हे रंग कातीचेर दसून उरनात आनी दोळ्यांकय दुखापत करीनात. ते भायर होळी खेळतना चुकून पोटांत वचत जाल्यार सुद्धा कसलीच दुखापत जांव शकना.
विज्ञान शिकप म्हणजे फक्त प्रयोगशाळेत प्रयोग करप न्हय तर आपल्या शिक्षणाचो समाजाक कायदो करून दीवप हो हांवेस बाळगुन ज्ञानप्रसारकाच्या विद्यार्थ्यानी डॉ. प्रभात देसाय, डॉ. राजेश पेडणेकार, डॉ.
उमेश गांवस सारख्या तज्ञ मार्गदर्शकांच्या देखरेखींत हे रंग तयार केल्यात.
डॉ. सिंथिया गवंडी, डॉ. वृता कडकडे, डॉ. सुदेश मोरजकार, डॉ. अभिजीत शेटगांवकार आनी डॉ. दिपेश हरमलकार हांच्या पंगडान हो प्रकल्प पूर्ण केला. ह्या कुशळ आनी जाणकार पंगडान खुपश्या सेल्फ हेल्प ग्रुप आनी ग्रामीण महिलांक असले रंग तयार करपाचें प्रशिक्षण दिवन स्वयं रोजगाराची वाट दाखयल्या. हे रंग महाविद्यालयांत विक्री खातीर उपलब्ध आसात. ते खातीर
डॉ. राजेश पेडणेकार 7038245519 हांचे कडेन संपर्क करूं येता.
मुख्यमंत्री डॉ प्रमोद सावंत हांचे हस्तुकी ह्या सैमिक रंगांचे लोकार्पण पर्यावरण मंत्र्याच्या उपस्थितींत जाल्लें. ह्या रंगांचो समेस्तांनी वापर करूया आनी ह्या वर्साची होळी पर्यावरण पूरक पद्धतीन मनोवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
