भांगरभूंय | प्रतिनिधी
आमी नोकरी करतात, ताचे फाटल्यान आमचो एक सुवार्थ आसता. तो म्हळ्यार आमकां एक नोकरी मेळची, सरकारी मेळत तर दुदांत साकर. पूण खरें म्हळ्यार आमच्या शिक्षणान आमी सैमाक त्रास जावपी गजाली खूब पयस करूं शकतले, हाचो विचार करपाक जाय. पर्यावरण दुखावलां, देखून तें इबाडलां. सकाळीं थंडी आसता, पूण मागीर दीस जाता म्हणसर गर्मी जावपाक लागता. पावस कितलो आनी केन्ना लागत हाचो नेम ना. मागीर आमकां बदलत्या वातावरणाचो विचार करचो पडटा. एकीकडे लायिल्लीं झाडां आमी मारतात. उंचेल्यो इमारती दर्यादेगेक बांदपाक आमी संवकल्यात. हे खातीर दर्या पुरून जमनी तयार केल्यात. शारांतलें उदक वचपाच्यो वाटो पुरोवन आमी इमारती, प्रकल्प बांदूंक लागल्यात. हाका लागून शारांनी उपाट उदक येवपाक लागलां. हें सगलें बंद करपाक शिक्षण तर जायच, नेमूय जाय. पूण हें बंद करपा विशीचें संशोधनूय जाय.
सद्या गाडयो चलोवपाक जें इंधन जाय तें पॅत्राॅल, डिझल (जे केन्ना तरी बंद जातलेंच) हांच्या बदल्याक लायटीचेर चलपी गाडयो चलोवपाक आमी सुरवात केली. आतां सूर्य शक्ती म्हळ्यार सौर शक्तीचो उपेग सुरु करचे वाटेन आमी काम करतात. तांतून यश मेळूं येता. मांडवी न्हंयेंत जें उदक येता तें कर्नाटकान आडायलें तर आमकां उदका खातीर पर्याय आत्तां पसुनूच सोदूंक जाय, जो 105 किमीचो दर्या आमकां मेळ्ळा ताचें उदक मनीस वापरूं शकता, अशें जावपा खातीर प्रयोग करचे पडटले. हाचे खातीर विज्ञान शाखेंत वचपाक विद्यार्थ्यांक आमी चड प्रोत्साहन दिवचें पडटलें. सर्त पसून दवरची पडूं येता. विज्ञानाच्या विद्यार्थ्यांक उदका विशींचे संशोधन सर्तीची कल्पना दिवनूच फुडलें शिक्षण घेवपाक उर्बा दिवची पडटली. तांकां तशी सुचोवणी शिक्षकांनी दिवपाक जाय. सरकारान तांच्या शिक्षणाचो, उदकाच्या पर्यांयांचो (उदकाचें उदक शुद्ध करप) सोद घेवपाक ते काम करतले, ताचो खर्च उखलूंक जाय.
आतां बारावेच्यो परिक्षा आसात. अंदूंच तुमी बारावी परिक्षा पास जाले काय नवें शिक्षणिक धोरण काॅलेजींत सुरु जातलें. तेन्ना बारीक चवकशी करूनच प्रवेश घेयात. ताकतीक करू नाकात. परिक्षा दिले उपरांत निकाल लागसर तुमच्या हातांत भरपूर वेळ आसा. ताचो उपेग ही म्हायती काडपाक करात. पास जातलोच/ जातलेंच हें मतीन दवरुनूच चवकशी करपाक सुरु करात. प्रत्येक फांट्याचो जोड अभ्यास करताले, तसो तुमकां प्रत्येक विशयाचो मात्सो तरी अभ्यास करचो पडटलो. तुमचे आवडीचें वा झेपता ते विशय घेवपाक तुमका मेकळीक आसतली. फक्त आतांचोच विचार तुमी करूं नाकात तर फुडल्या 10 वर्सांनी कसलो बदल जावपाचो आसा, ते नजरेन तुमी फाट्याचो विचार करात. तुमचे वांगडा दुसऱ्यांकूय म्हजो कितें ना कितें लाव जातलो हाचोय विचार करात. परिक्षा दिताना थंड तकलेन पेपर बरयात. तुमकां जर जाप येना तर आबूज जावं नाकात. ती जाप सोडून तुमकां येता ती जाप बरोवपाक घेयात. आनी तुमकां जो ज्यादा वेळ दिला त्या वेळांत उरिल्ल्या प्रस्नांची जाप दिवपाचो यत्न करात.
पेपर हातांत पडलो काय बरोवपाक सुरु करू नाकात. तो पेपर तुमचोच आसा? तुमकां शिकयिल्ल्या अभ्यासक्रमा वेलेच प्रस्न आसात? कोड नंबर सारको आसा, हें पळयात. कितें तरी चुकलां हें दिसलें जाल्यार बेगोबेग शिक्षक/ शिक्षकेच्या हें लक्षान हाडून दियात. सगलें सारकें आसत तर तुमकां सांग मेरेन पेपर बरोवपाची ताकतीक करू नाकात. प्रस्नपत्रिका थंड तकलेन वाचात. हें करतना तुमी पेन्सिल घेवन खंयचो प्रस्न सोडयतले ते मार्क करात. आनी जेन्ना तुमी ती जाप बरोन जाली काय पेनान पेन्सिलान मार्क केल्ली खूण परत मार्क करात. ताचे पयलीं तुमचो आसनक्रमांक शब्दांनी आनी अक्षरांनी सवकास बरयात. ह्यो गजाली जरी बारीक सारीक आसल्यो तरी म्हत्वाच्यो थारतात. तुमका शुभेत्सा.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
