पंजाब वांचोवपाचो वेळ आयला !

भांगरभूंय | प्रतिनिधी

देशाची संप्रभुता, अखंडता तिगोवन धरपाच्या उद्देशान दंड संहितेत देशद्रोह्यांच्या आड तजवीज केल्ल्या खरांत खर कायद्यांचो उपेग सरकारां राजकी विरोधी विचारक, पत्रकार, लेखक, कवी, वकील, आध्यापक, समाजसुधारक, फिल्म निर्माते, अभिनेते, कलाकार हांचे विरोधांत तांकां भिरांत घालपाक, छळपाक करतात आनी ज्या खऱ्या प्रकरणांनी वापरपाची चड गरज आसा थंय फाटी सरता अशें चित्र दिसता. भारतीय दंड संहीतेच्या अनुच्छेद 124 A खाला देशद्रोही थारावन वर्स 2010 सावन आयज मेरेन सुमारे 13,000 लोकांचेर ह्या कायद्या खाला खटले लागल्यात. राजकी विरोधकां विरोधांत ह्या कायद्यांचो चड उपेग जाता ते पळोवन सुप्रीम कोर्टाक हो कायदो तात्पुरतो स्थगीत करपाचो निर्णय घेवचो पडला. तरीय बेकायदेशीर कृत्य प्रतिबंधन कायदो (UAPA) वापरून राजकी विरोधकांक आतंकवादी थारावन सरकार बंदखणीत धाडत आसा. खंयच्याय न्यायिक प्रक्रियांचे सोपास्काराविणे कृती करपाक मेकळीक मेळोवन दिवपी संशोधन 2019 वर्सा सरकारन केल्ल्यान हो कायदो चडच धारदार जाल्लो आसा.
मोदींची हत्या आनी देशाची लोकशाय व्यवस्था उलथावन उडोवपाच्या कटाचे आरोप पुण्यात 2018 वर्सा जानेरांत एल्गार परिषद आयोजित समारभांत सहभागी जाल्ल्या 16 दावे विचारसरणीच्या वकील, विचारक, प्राध्यापक, लेखक, कवी, समाजसुधारक हांचे विरूद्ध लायल्यात. UAPA क लागून नियमीत जामीन मेळप कुस्तार जाल्ल्यान भलायकी इबाडिल्ले चार जण सोडून बाकीचे गेल्ली पाच वर्सा बंदखण भोगतात. 82 वर्सा पिरायचो स्टॅन स्वामी दुयेसान बंदखणीत सोंपलो. दैनंदिन कामा करप जांकां कुस्तार जाता ते दुयेंत जाण्टे देशा खातीर धोकादायक आतंकवादी कशें कितें थारतात हाचेर विस्वास दवरप कुस्तार जाता. पाच वर्सा उपरांत आयज मेरेन तांचे आड लागिल्ल्या वट्ट आरोपांच्या फकत 60 टक्के आरोपांच्या डिजिटल पुराव्यांच्यो प्रति तांकां तपास यंत्रणानी दिल्यात. मात दुसरे वाटेन महाराष्ट्र, झारखंड, आंध्र प्रदेशात धुमशेणां घालपी, नरसंहार करपी लुटारू खंडणी बहाद्दर भिरांकूळ कमांडरांक जेरबंद करून, मारून उडोवन माओवाद, नक्षलवाद सोंपोवन उडवपाचे बाबतीत केंद्र आनी राज्य सरकारां सामकी अपेशी थारल्यात.
आपल्या सरकारी गाडयेन आतंकवाद्यांक श्रीनगर सावन चंदीगड पावोवपाच्या बेतात आसतना धरिल्लो खरो देशद्रोही डीएसपी दविंदर सिंगाच्या तपासात कसलीं देशविरोधी कारस्थानां सांपडलीं, कितले राजकारणी घुस्पल्ले, ताचो मात खुलासो जाल्लो ना.
नागरिकता दुरूस्ती कायदो (CAA) आनी नागरिकता नोंदणी (NRC) विरोध करपी चळवळकार नताशा नरवाल, देवांगना कलिता, आसिफ इकबाल तनहा हांकां दिल्ली दंग्याचे दोशी आतंकवादी थारावन तपास यंत्रणानी UAPA कायद्या खाला बंदखणीत धाडिल्ले. मागीर तांचो जामीन जालो. पूण जाहीर सभेंत आंदोलनकाऱ्यांक गोली मारो म्हणून चिथावपी तेन्नाचे अर्थ राज्यमंत्री अनुराग ठाकूर आनी वरिष्ठ पोलिस अधिकाऱ्यांच्या उपस्थितींत कॅमेऱ्या मुखार आंदोलनकारांक बुद्द शिकोवपाची धमकी दिवपी कपिल मिश्रा ह्या सत्तापक्षाच्या म्हाजनां आड आयज मेरेन कसलीच कायदेशीर कारवाय जाल्ली ना.
दिल्लींत शेतकार आंदोलनाची रुपरेशा, दिका हांची सविस्तर म्हायती दिवपी टूलकीट बंगलोरच्या दिशा रवी हे तरणाटेन तयार केल्ले. ते टूलकीट खलिस्तानी समर्थक आरोप लागिल्ल्या शेतकारांच्या गटान पातळायिल्ले इतल्याच खातीर देशविरोधी कृत्याचे आरोप लावन UAPA खाला दिशा रवीक बंदखणीत धाडिल्ली.
हाचे उलट उघडपणान खलिस्तानाचें समर्थन करपी गटाच्या हजारांनी समर्थकांनी बंदुको, तलवारी, भाले, कोयते, कृपाणा, दांडे घेवन नेतो अमृतपाल सिंगा वांगडा अमृतसरांत अजनाला पुलीस स्थानकाचेर हल्लो चडोवन पुलिसांक जखमी करून स्थानक ताब्यांत घेतिल्ले कडेन केंद्र आनी राज्य सरकार मोनेळ पांगरून सामकीच निश्क्रीय दिसलीं. देशाच्या अखंडतायेक, संप्रभुतेक आव्हान दित केल्लो हो सशस्त्र हल्लो भारतीय दंड संहितेच्या अनुच्छेद 124 A खाला देशद्रोहाचे कृत्य थारता, हातूंत दुबाव ना. ह्या प्रकरणाची सादी चवकशी सुदीक राज्य सरकारान केली ना आनी केंद्र सरकारानूय. मात दबावा खाला बंदखणीत आशिल्ल्या लवप्रीत तुफान ह्या अमृतपालाच्या गुन्यांवकार इश्टाक मात सोडून दिलो. प्रधानमंत्री, गृहमंत्री मौनीबाबा जाल्ले दिसले. चीनाक आमी भियेनात अशी हालींच गर्जना करपी विदेश मंत्री जयशंकराचीय वाचा बंद. पंजाबात अमृतपाल सिंगाक भिंद्रानवाले 2.00 आवृत्ती म्हूण तोखणाय जावपाक लागिल्यान इंदिरा गांधी वेळच्या इतिहासाची पुनरावृत्ती जावची न्हय हे खातीर न्यायपालिकेन तरी हे गजालीची खर दखल घेवन सरकाराक त्या प्रकरणाचेर क्रियाशील जावपाचे निर्देश दिवक फावो आशिल्ले तर तीवूय ओग्गी.
मोदी हांच्या बापायचें नांव घेवपाक चूक जाल्ले कडेन देशभरांतल्या राज्यांनी तक्रारी दाखल जाल्यो. एका राज्यांतल्या पुलीस पथकान दुसऱ्या राज्यांत वचून आरोपीक विमानांतल्यान देवोवन अटक केली, मात अमृतपाल सिंगान देशाचे गृहमंत्री अमित शाहक इंदिरा गांधीक मारून उडयिल्ली तशी मारून उडयतले अशी जगजाहीर धमकी दिले उपरांतूय सबंद देशांत खंयच्याय पुलीस स्थानकांत ताचे आड सादी तक्रार नोंद जायना आनी राज्य, केंद्र तपास यंत्रणा ताका चवकशेकूय आपयनात हाचें अजाप दिसता. दिल्लींत सिसोदियाक अटक जाली तेन्ना मात केंद्रीय पुलीस दलाचे जवान तैनात केल्ले.
फकत 6 म्हयन्यांत अमृतपाल पंजाबांत शक्तिशाली कसो जाता, ताका फंडींग कोण करता, ताका बळगे कोणाचे हे गुप्तहेरां कडल्यान जाणून घेवपाच्या कामांत राष्ट्रीय अन्वेषण एजन्सी (एनआयए) साप्प अपेशी दिसली. सीबीआय, ईडी हे सिसोदिया सोरो प्रकरण तपासांत आनी इन्कम टॅक्स विभाग बीबीसी टॅक्स सर्व्हे प्रकरणांत गुंथून उरले. तांणी अमृतपालाच्या गंभीर प्रकरणा कडेन मात दुर्लक्ष केलें.आयज मोदी- शाह हांणी कर्नाटका परस पंजाबांत विजयरथ चालीक लावपाची चड गरज आसा. राहूल गांधीनूय आता पंजाब जोडो- पंजाब बचाव पदयात्रा सुरू करपाचो वेळ आयला.
सद्याच्या काळांत देशांत देशभक्तांचो उणाव ना. भारत माता की जय म्हण नाजाल्यार थापटायतां म्हणपी देशभक्तांचे चोंबे उत्तर प्रदेश आनी शेजरा कर्नाटकांतूय व्हडा संख्येन आसात. न्यूझीलंड -पाकिस्तान मॅचीत पाकिस्तानाक तेको दिवपी मुस्लिमाक रस्त्यार दिमी मारून भारत माता की जय म्हणपाक लावपी गोंयकार देशभक्तांचो विडिओ देशान पळयलो. भारत माते खातीर शिव, श्रीराम, बजरंग हांच्यो सेना, दलां, संघ तशेंच कळंगूटचे देशभक्त हांणी आपले धवे, खाकी, भगवे आनी इतर रंगांचे गणवेश, फेटे चडोवन आतां पंजाबात कवायती करपाचो आनी घर घर तिरंगा हुबोवपाचो तशेंच कर्नाटकांतलो सांसद तेजस्वी सूर्यान सांगात्या वांगडा पंजाबांत मोटर सायकल रॅली काडपाचो वेळ आयला. अमृतपाल सिंग आनी ताच्या सांगात्यानी भारत माताकी जय म्हळे ना जाल्यार तांकां चलयत पाकिस्तानांत पावोवप सोंपें. थंयच्यान पाकिस्तान जेमतेम 25- 30 किलोमिटरांचेर आसा.

दीपक लाड
पर्वरी