भांगरभूंय | प्रतिनिधी
वेळसांवकारांचो आरोप; प्रस्न घरांचो न्हय, प्रदुशणाचो आशिल्ल्याचो दावो
भांगरभूंय । प्रतिनिधी
मुरगांवः पांच- स घरां वाटावपा खातीर रेल्वे मार्ग पश्चीम वाठारांतल्यान उदेंत वाठारांत व्हरचे खातीर रेल्वे अधिकारी तयार जाल्यात, अशें सांगून कुठ्ठाळीचे आमदार अँथनी वाझ लोकांची गरजे भायर दिशाभूल करतात. हो प्रस्न पांच- स घरांचो ना. गांवांत कोळसो येरादारीक लागून जावपी प्रदुशण, रेलगाडयांचे येरादारीक लागून घरांक बसपी धपके, हांचो आसा. रेलमार्ग दुपदरीकरणा संबंदांत आमी कसलेंच राजकारण करिनात. गांव वाटावपा खातीर वेळसांवकार एकवटीत आसात, असो सूर वेळसांवकारांनी घेतिल्ले बसकेंत आयलो.
तीन दिसां आदीं आमदार वाझ हांणी रेल्वे अधिकाऱ्यां सयत वेळसांव गांवाक भेट दिल्ली आनी दुपदरीकरण कामाची पळोवणी केल्ली. तांणी ज्यो कांय सुचोवण्यो केल्ल्यो त्यो अधिकाऱ्यांनी मान्य केल्ल्यो. ताका लागून दुपदरीकरणा संबंदांतलो प्रस्न सुटावो जाला, अशें वाझ हांणी म्हणिल्लें. पूण वाझ हे लोकांची दिशाभूल करतात. तांकां हे संबंदांत कसलोच अभ्यास ना, असो दावो वेळसांवकारांचे बसकेंत केलो.
दुपदरीकरणाक लागून गांवांत व्हड प्रदुशण जातलें. ताका लागून पंचायत मंडळ लोकां वांगडा आसा. आमदार वाझ हांणी भेटी संबंदांत वेळसांवकारांक वा पंचायतीक कसलीच म्हायती दिवंक नाशिल्ली. आमकां कळयिल्लें जाल्यार आमीय थंय येवपाचीं. संबंदीत रेल्वेन दुपदरीकरणा रेलमार्ग बदलपा खातीर खंयचो आराखडो तयार केला, तें दाखोवपाची गरज आसा. तें आमकां एकूय कागदपत्र दाखयनात. तांचे विस्वास कसो दवरपाचो, असो प्रस्न वेळसांवची सरपंच डायना गौव्हैआ हांणी उपस्थीत केलो.
रेल्वे अधिकारी सत्य लिपयतात, असो दावो आदली मंत्री तशेंच आदली थळावी आमदार एलिना साल्ढाणा हांणी केलो. सध्याच्या रेलमार्गाच्या मध्यभागा सावन चाळीस मिटर रेल्वेमार्ग विस्तारीत जातलो. ताका लागून लोकांचे वसरे, वयेंतल्यान रेलमार्ग वचपाची शक्यताय आसा. ऑस्ट्रेलिये सावन कोळसो आयात करून बोटींतल्यान मुरगांव बंदरांत हाडटात. कर्नाटकांत एक व्हड आनी ल्हान बारा बंदरां आसतना थंय थेट कोळसो कित्याक व्हरनात? रेलमार्ग दुपदरीकरण समस्या वाडयतले. घरा वाटावपा खातीर रेलमार्ग कसो दुसरे कडेन व्हरतले, हे रेल्वेन सांगचें, अशें आव्हान तांणी दिलें.
हो प्रस्न घरा वाटावपाचो ना, तो प्रदुशणाचो आसा. पुर्तुगेज काळांत लोकांचे सोयी खातीर भाटकारांनी आपल्यो जमनी रेलमार्गाक दिल्ल्यो, कोळशाचे येरादारी खातीर न्हय. कोळशाचो गोंयाक कसलोच फायदो ना, तो कर्नाटकाक आसा, अशें गोंयचो रापणकाराचो एकवट संस्थेचे आग्नेल फर्नांडीस हांणी सांगलें.
समाज वावुरपी शंकर पोळजी हांणी सांगलें, सरकारी यंत्रणा थळाव्या लोकां कडेन दादागिरी करता. कोळशाक लागून मुरगांवां रावपी लोकांचे भलायकेचेर व्हड परिणाम जाला. समाज वावुरपी आर्वील डिसोझा हांणी सांगलें, आमदार फटीचीं आस्वासनां दिता. प्रदुशणा आडचें झूज एकवटान लडल्यार कोणूच कांयच करपाक शकचो ना. राजकारणा विरयत सगळो गांव एकवटीत जाला. वेळ आयल्यार आमी न्यायालयांत वतले. लोकांच्या प्रस्ना वांगडा राविल्ले खातीर आमकां वेळसांव पंचायत मंडळाचो अभिमान आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
