म्हापश्यां भौशीक शौचालयाचें नळ कनेक्शन तोडलें

भांगरभूंय | प्रतिनिधी

थळाव्या लोकां मुखार समस्या; थकीत बील 2 लाख

भांगरभूंय । प्रतिनिधी

म्हापशें: म्हापशें पालिकेन उदकाचें बील वेळार भरूंक नाशिल्ल्यान भौशीक बांदकाम खात्यान गांवसावाड्या वयल्या भौशीक शौचालयाचें नळ कनेक्शन तोडलें. ताका लागून सुमार 20ते 25 कुटुंबां मुखार समस्या निर्माण जाल्या. ही थकबाकी 2.03 लाख रुपया आसा.

तारीर गावसावाड्या वयल्या भौशीक शौचालयाचें उदकाचें बील फाटल्या कितल्याशाच म्हयन्यां सावन पालिकेन भरूंक ना. ह्या प्रलंबीत बिलाची रक्कम 2,03,501 इतल्याचेर पावल्या. भौशीक बांदकाम खात्याच्या उदका पुरवण विभागान पालिकेक धाडिल्ल्या उदका बिला कडेन आडनगर केल्ल्यान तातूंत वाड जावन ती 2 लाखां परस जाल्या.

गावसावाडो तारीर वाठारांतल्या लोकां खातीर हें भौशीक शौचालय म्हत्वाचें आसा. लोकांक विवीध कारणांक लागून वैयक्तीक शौचालयाची समस्या सतायता. सुमार 20-25 घरां ह्या शौचालयाचेर निंबून आसात. नितळ भारत मोहीम आनी उक्ताडार शौच करपाक प्रतिबंध कार्यावळी खाला ह्या घरां खातीर ही वेवस्था आशिल्ली. पूण पालिकेन थकीत बील दवरिल्ल्यान आतां ह्या शौचालयाचें नळ कनेक्शन भौशीक बांदकाम खात्यान तोडून उदकाचो मिटरूय जप्त केला. ताका लागुन वयल्या लोकांक अडचणीक फुडो करचो पडला.

ह्या शौचालयाक नळ कनेक्शन 19 ऑगस्ट 2016 ह्या दिसा दिल्लें. तेन्ना सावन थळावे लोक ह्या शौचालयाचो वापर करताले. पूण वेळार नळाचें बील भरपाक पालिकेची आडनदर जाल्ल्यान उदका पुरवण विभागाक ही कारवाय करची पडली.

गोंय सरकारान सध्या थकबाकीदारांक थाकाय म्हूण उदकाचें बील भरचे खातीर ओटीएस येवजण जारी केल्या. तरी लेगीत म्हापशें पालिका ओटीएसचो लाव घेवपाक अपेशी थारल्या. ताका लागून फाटल्या सप्तकांत उदका पुरवण विभागान ह्या शौचालयाचें नळ कनेक्शन तोडलां. ही समस्या गंभीर आसा. मुख्याधिकाऱ्या कडेन हे आदींच समस्या मांडिल्ली आनी थकबाकीची रक्कम भरपाची विनवणी केल्ली. नळ कनेक्शन तोडिल्ल्यान सध्या लोकां मुखार समस्या निर्माण जाल्या, अशें थळावे नगरसेवक प्रकाश भिवशेट हांणी सांगलें.

ओटीसी खातीर अर्ज करतलेः पालिका मुख्याधिकारी

नळ कनेक्शन तोडील्ल्याची म्हायती पालिकेक मेळ्ळ्या. गरजेची प्रक्रिया पुराय करून थकीत बील भरतले. रक्कम व्हड आशिल्ल्यान आमी ओटीसी खातीर अर्ज करतले, अशें पालिका मुख्याधिकारी अमितेश शिरवयकार हांणी सांगलें.