भांगरभूंय | प्रतिनिधी
बार्देस, पेडणें, साश्ट म्हालांतल्या सवाय धान्य दुकानदारांची मागणी
भांगरभूंय । प्रतिनिधी
म्हापशें: गोंय सरकारान फुकट धान्य कोटा वितरीत करचे खातीर सवाय धान्य दुकान धनयांक अर्थीक मजत दिवची, अशी मागणी बार्देस, पेडणें आनी साश्ट म्हालांतल्या कांय सवाय धान्य दुकान धनयांनी केली.
सवाय धान्य दुकान धनयांच्या म्हणण्या प्रमाण, रेशन कार्ड धारकांक फुकट रेशन कोटा वितरीत केल्ल्यान तांकां वेव्हार करप कठीण जाता. फुकट कोटा वितरीत करतना तांकां जावपी विवीध खर्चा संबंदांत सरकारान अर्थीक मजत दिवची.
आमी नागरी पुरवण खात्याच्या गुदांवांतल्यान फुकट धान्य कोटा व्हरतात आनी तो रेशन कार्ड धारकांक दितात. हातूंत आमचो कसलोच फायदो जायना, कारण कोटा येरादारी, मजूर खर्च आनी हेर शुल्का सयत विवीध खर्च जाता. आमकां एपीएल कार्डांतल्यान येणावळ मेळटा, सध्या जें उणें केल्यात, अशें एका दुकान धनयान सांगलें. मजगतीं, शुक्रारा सांजे वेळार बार्देस, पेडणें आनी सास्ट म्हालांतल्या सुमार 60 सवाय धान्य दुकान धनयांनी म्हापशेंच्या राम मनोहर लोहिया बागेंत बसका घेवन चर्चा केली. ते उपरांत ते पत्रकारां कडेन उलयताले. ह्या वेळार सुनिता बुगडे, संतोष प्रभू आनी सुशांत धारगळकार हांणी दुकान धनयां वतीन आपल्यो समस्या मांडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
