नितळसाण राखात, नाजाल्यार कारवाय

भांगरभूंय | प्रतिनिधी

मॉवीन गुदिन्होः ‘नितळ सुजल शक्ती सन्मान’ कार्यावळींत पंचायतींक शिटकावणी

भांगरभूंय । प्रतिनिधी

मुरगांवः गोंय नितळ दवरचे खातीर जांची आमकां मजत मेळना, तांचेर कारवाय करचे खातीर आमी न्यायालयाच्या आदेशाची वाट पळोवचे नात. पंचायत वाठारांत नितळ भारत मोहीम आनीक गंभीरपणान घेतले. ते खातीर पंचायत आदार करिना जाल्यार तांचेरूय खर कारवाय जातली, अशी शिटकावणी पंचायत मंत्री मॉवीन गुदिन्हो हांणी दिली.

बोगमाळो वाठारांत नितळ भारत मोहिमे खाला आयोजीत केल्ल्या ‘नितळ सुजल शक्ती सन्मान’ कार्यावळींत गुदिन्हो उलयताले. ह्या वेळार उत्तर गोंय जिल्हो पंचायत अध्यक्ष सिद्धेश नायक, चिकोळणा- बोगमाळोचे सरपंच जगन्नाथ महाले, चिखलीचे सरपंच कमलाप्रसाद यादव, गोंय पंचायत महिला शक्ती मोहिमेची अध्यक्ष दीक्षा कांदोळकार, पंचायत सचीव मिनीनो डिसोझा, सांकवाळ जिल्हो पंचायत वांगडी अनिता थोरात, पंचायत संचालक सिद्धी हळर्णकार हाजीर आशिल्ली.

कार्यावळींत गोंयांतल्या 191 पंचायतींतल्या खूबशा पंचायतींचे सरपंच, पंचायत सचीव आनी हेर पदाधिकारी हाजीर आशिल्ले. फाटल्या काळांत नितळ भारत मोहिमे खाला ज्या पंचायतींनी बरो वावर केला त्या पंचायतीचे सरपंच आनी पदाधिकाऱ्यांचो भोवमान केलो.

गोंयच्या भोवतेक पंचायत वाठारांत एमआरएफ शेड उबारून कोयर वेगळो करून उपरांत ताचो योग्य तरेन विलो लावचे खातीर पावलां उखलतात. मात अजून लेगीत कांय पंचायत वाठारांनी कोयर एकठांय करिनात. तशेंच तांचो योग्य तरेन विलो लायनात. मात आतां नितळ भारत मोहीम येसस्वी करचे खातीर तें ‘मिशन’ म्हूण चालीक लायतले. तशेंच गोंयांतल्या खूबश्या पंचायतींत घरपटी सयत विवीध भाडें मेळून 50 कोटीं परस अदीक थकबाकी आसा. पंचायतींनी आतां हाचे कडेन गंभीरपणान पळोवन थकबाकी वसूल करची. ते खातीर योग्य पावलां उखलपाची गरज आसा. फक्त सरकारा कडल्यान मेळपी निधीची वाट पळयत रावूं नाका, असो सल्लोय मंत्री गुदिन्हो हांणी दिलो. गोंयांत आतां नितळ भारत मोहीम दुसऱ्या पांवड्यार पावल्या. खूबशा पंचायतींनी एमआरएफ शेड उबारून कोयराचो प्रस्न सोडयला. मात अजून लेगीत कांय पंचायतींचो कोयर एकठांय करपाचो आनी ताचो योग्य विलो लावपाचो वावर जायना. ज्या पंचायत वाठारांनी ही मोहीम येसस्वी करचे खातीर आमकां आदार मेळना तांकां घरा धाडटले, अशी शिटकावणी मंत्री गुदिन्हो हांणी दिली.