भांगरभूंय | प्रतिनिधी
नीता अंबानीः डब्ल्यूपीएल मॅची वेळार प्रतिक्रिया
भांगरभूंय
मुंबय : मुंबय इंडियन्स पंगडान बायलांच्या क्रिकेट प्रिमियर लीगाचे उक्तावणाचे मॅचींत बरी कामगिरी केली. हांगाच्या डी. व्हाय. पाटील स्टेडियमांत देशांतले हे बायलांचे पयले लिगेचें उक्तावण जालें. त्या वेळार मुंबय इंडियन्सची धनी नीता मुकेश अंबानी हाजीर आशिल्ली.
मुंबय इंडियन्स पंगडान गुजरात जायंटस आडच्या खेळाचेर सुरवेक सावन शेक दवरलो. 143 धांवड्यांची नोंद करून तांणी एक रोमांचक सुरवात केली. चलयांक दरेका बाॅलाक उर्बा दिवपाक स्टेडियमांत बायलो आनी दादले दोगूय व्हड संख्येन हजर आशिल्ले. नीता अंबानीय, जांकां चडांत चड बायलो क्रिकेटींत आनी हेर खेळांनी आयिल्ल्यो जाय, त्योय आपल्या पंगडाच्या खेळगड्यांक निमणे मेरेन उर्बा दितना दिसल्यो. उपरांत तांणी पोस्ट गेम ड्रेसिंग रुप खोस मनोवपाक फुडाकार घेतलो.
बायलांचे प्रिमियर लिगेचो हो पयलो दीस अविस्मरणीय आशिल्लो. खेळगडी बायलांचे जिणेंतलो तो एक प्रतिकात्मक दीस. डब्ल्यूपीएल सर्त बायलांक खेळपाक आनी खेळांत करियर करपाक मदत करतली. ह्या तरणाट्या चलयांक आपलें सपन साकार करपाक ही सर्त मजत करतली. तांची इत्सा पुराय जातली, अशें नीता अंबानी हांणी सांगलें.
मुंबय इंडियन्स पंगडाची जर्सी आकर्शक आसा. हे पयले मॅचीन तांकां बरो अणभव मेळ्ळो. खूबशे तरणाटे खेळगडे ह्या पंगडांत आसात. मुंबय इंडियन्साचे खेळगडे निर्भय आसात. आमच्या चलयांनी आयज बरी कामगिरी केली. ताचो अभिमान आसा. खास करून आमची कॅप्टन हरमन कितें खेळ्ळी!! अमेलिया केरूय अजापीत करपी खेळ खेळ्ळी. तिणें बेटिंग आनी बाॅलिंग बरी घाली, अशें अंबानी हांणी सांगलें.
नीता अंबानी हांणी मॅच चालू आसतना खेळगड्यांक उर्बा दिली. मैदानांत इतले लोक आशिल्ले, की तांकां पळोवन खेळगडेय धादोशी जाले. “फकत आमी चलयांक उर्बा, आदार दिवया. सगळ्या पंगडांक हांव परबीं दितां. तांणी बऱ्यांतलो बरो खेळ करचो, अश्यो अंबानी हांणी शुभेत्सा दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
