भांगरभूंय | प्रतिनिधी
आदले राष्ट्रपती, शास्त्रज्ञ डॉ. अब्दुल कलाम म्हणटाले, “जे सपनां पळयतात तेच तीं साकार करपाक शकतात.” जिद्द, ध्यास, इत्सा, तळमळ आनी खर आत्मविश्वास बाळगिलो जाल्यार खंयचोय मनीस वा संस्था कितलींय मोटीं आव्हानां पेलपाक शकता. हो ध्यास बाळगुनूच संकल्प थिएटर्सान निर्माण केल्ली चेतना चॅरिटेबल ट्रस्ट ही संस्था. ट्रस्टा मदीं दरेकल्याचो ट्रस्ट (विश्वास) आसलो जाल्यारच एकाद्री संस्था तिगता, फुलता, नांवा रुपाक पावता… हाची देख म्हणल्यारच चेतना चॅरिटेबल ट्रस्ट.
1998 वर्सा संकल्प थिएटर्साची स्थापना जाली. नाट्य कलाकार, लेखक एकठांय आयले आनी घडली ही संस्था. कला अकादेमीचे नाट्य सर्तींत घुस्मट, गांधी विरुद्ध गांधी, अस्तित्व, सौ अशीं नाटकां सादर करून इनामां जोडलीं. गोंया भायर मंगळुरांत सुद्दां वचून तांणी नाटकां सादर करून इनामां जोडलीं. सांस्कृतीक मळा वांगडाच समाजीक मळारय संकल्प थिएटर्सान वावर केलो. काकोडेंच्या सरकारी हॉस्पिटलाचो दादल्या वार्डाची देखरेख करप, गरजू विद्यार्थी आनी कलाकारांक अर्थीक मदत करप, हुशार आनी गुणवान विद्यार्थ्यांचो भोवमान करप, वनमहोत्सव, आतां आमदार निलेश काब्राल हांच्या पालवान सुरू आसा ती अँब्युलन्स सेवा, रक्तदान शिबिरां, भलायकी शिबीर, बुद्दीबळ सर्त तशेंच संकल्प नाटक महोत्सव फाटलीं 20 वर्सां सावन आयोजीत करीत आसा.
संकल्पाच्या नाटक महोत्सवाच्या समारोप सुवाळ्याक खाशेल्या विद्यार्थ्यांची नाचाची कार्यावळ आसताली. ही कार्यावळ म्हणल्यार महोत्सवाचो एक भाग जाल्लो. आमी ह्या भुरग्यां खातीर जायतें कितें करपाक शकतात हो विचार खोलायेन मनांत रुजलो आनी त्या खातीर जें जें कितें करप शक्य आसा तें तें करपाचो ध्यास धरलो. ह्या ध्यासाचें फळ म्हणल्यार तांचे खातीर एक सगळ्या सुविधांनी युक्त अशी शाळा उबारपाचो विचार पक्को जालो. ह्या हावेसान संकल्पाच्या वांगड्यांनी चेतना चॅरिटेबल ट्रस्टाची स्थापना केली. आंतर राष्ट्रीय दर्जाचें स्कूल दिवपाचें सपन पळयलें, सपन पळोवन राजू नायक आनी सांगाती थांबले नात, ते तन मन धनान शाळे खातीर झटपाक लागले. खाशेल्या भुरग्यांक समाजांत हेर भुरग्यां इतलोच मान मेळपाक जाय आनी त्या खातीर तांची शाळाय खास आसपाक जाय हो उद्देश नदरे मुखार दवरून सगळे वांगडी वावराक लागले. नाटकाचे प्रयोग करून संकल्प थिएटर्सान देड लाख जमयिल्ले, ह्या पयशांतल्यान तशेंच दान कुपनां खपोवन काकोड्यां हांगा 10200 चौखण मिटर सुवात विकती घेतली.
खंयचेंय काम हातांत घेतलां तें पुर्णत्वाक व्हर मेरेन थांबप ना हो आमचो संकल्प. राजू नायकाच्या फुडारपणा खाला सगळे नेटान कामाक लागिल्ले. गोंया भायर मुंबय, हुबळी शारांनी भेट दिवन थंय आशिल्लीं खाशेलीं स्कुलां पळयलीं, इंटरनॅटाचेर ह्या संबंदी जायती म्हायती मेळयली. वेगवेगळ्या मनशां कडेन भासाभास केली. ह्या प्रवासांत साबार मनशांचो सांगात लाबलो. खास करून आमदार निलेश काब्राल आनी प्राचार्य भास्कर नायक सर. हो सांगात प्रेरणा दिवपी.
एके वटेन शाळेचे इमारतीचें काम चालू आसतनाच 2015 वर्सा 32 भुरग्यांक घेवन संदेश काकोडकार हांच्या घरांत शाळा सुरू जाली. आयज भुरग्यांचो आंकडो 41चेर पावलो. पालकांक कसलेच तरेची फी आकार नासतना आनी सगळ्यो तरेच्यो सुविधा चेतना स्कूल दीत आयलां. भुरग्यांक हाड-व्हर करपाक खाशेली येरादारी वेवस्था, पौश्टीक आहार, युनिफॉर्म आनी हेर सुविधा. हें करपाक सुमार म्हयन्याक 1 लाख 80 हजार खर्च येतालो. एके वटेन नवे इमारतीचो खर्च आनी दुसरे वटेन हो खर्च अशी तारेवेली कसरत जाताली. पूण चेतनाचे वांगडी, बर्या मागप्यांच्या आदारान आडमेळीं हुपत मुखार वचत रावले.
खांदेर बशिल्ल्या सवण्याक खांदी मोडपाची भिरांत नासता कारण ताका आपल्या पांखांचेर पुराय विश्वास आसता. चेतना स्कुलाचो हो महामेरू म्हणल्यारच आमचे अध्यक्ष राजू नायक. आमचें प्रेरणास्थान. हातांत घेतिल्लें काम पूर्ण करप तांचो ध्यास. 2009 वर्सा पळयिल्लें सपन 2023 वर्सा पूर्ण जाता, हाच्या इतली दुसरी खोस आसूं येता व्हय?
चेतना स्कुलांत भितर सरतनाच प्रसन्न अशा वातावरणांत पाविल्ल्याचो भास जाता. गार्डन, मैदान, आकर्शीत करता. वणटीवेलीं चित्रां दोळे दिपकायता. व्यायाम शाळा, जंगल जीम, फन झोन, भुरग्यांक दिसपट्टो वेव्हार शिकोवपाक मिनी मार्ट, रांदची कूड, फिजीयोथेरापी कूड, वातानुकुलीत ऑडियो विज्युवल कूड अशी साबार तरेची वेवस्था आशिल्ली शाळा तयार जाल्ली पळोवन पळयिल्लें सपन साकार जालें हाचें समाधान दिसता. हे शाळेचें इतले बारीकसाणेन काम जालां देखून दरेकल्यान ती पळोवची. शाळा पळोवपा खातीर दनपरां 3.30 ते 4.30 वरां मेरेन लोकां खातीर उक्ती आसता. शाळेचो पयलो पांवडो तयार जाला आनी दुसर्या पांवड्यार हॉस्टेल सुविधा आनी वेवसायीक फांटो सुरू करपाचो हावेस आसा.
ही शाळा पळयतगीर दिव्यांगा खातीर वावुरप्यांकूय एक नवी नदर मेळपाक शकता. इतली सुंदर आनी सुविधायुक्त शाळा बरे भाशेन चलप ही गरज आसा आनी त्या खातीर जांकां जशें शक्य आसा तांणी आपली मदत करपाक फुडें सरचें असो उलो मारीन दिसता.
मंगलदास भट
8793306162
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
