भांगरभूंय | प्रतिनिधी
हातमागाचें उक्तावण; 60 बायलांक रोजगार
भांगरभूंय । प्रतिनिधी
वाळपयः आत्मनिर्भर गोंय स्वयंपूर्ण भारत येवजणे खाला गोंय हस्तकला म्हामंडळा वतीन केरी वाठारांत सुती साडयो, कपडे तयार करपाच्या हातमात यंत्रणेचें उक्तावण केलें. तातूंत केरीच्या 60 बायलांक रोजगार मेळटलो. सत्तरी म्हालांत साडयो तयार करपाचो हो पयलोच प्रयोग केला. लाखांनी रुपयांची मशिनरी यंत्रणा बसोवन ह्या प्रकल्पाचें उक्तावण थळावी आमदार डॉ. देविया राणे हांचे हस्तुकीं केलें.
हे विशिश्ट असो प्रयोग. हातूंतल्यान बायलांचे स्वयंपूर्णतेचें सपन साकार जातलें. हो प्रयोग येसस्वी जाले उपरांत सत्तरी म्हालाच्या खूबशा वाठारांनी बायलांक रोजगार दिवपाच्या उद्देशान अशे तरेचे प्रकल्प हातांत घेतले, अशें डॉ. राणे हांणी सांगलें.
केरीच्या 60 बायलांक हातमागा संबंदांतलें प्रशिक्षण गोंय हस्तकला म्हामंडळा वतीन दिल्लें. साडयो कश्यो तयार करप आनी ताचे फाटलें शास्त्र, हे संबंदांत तांकां वेगवेगळ्या पांवड्याचेर प्रशिक्षण दिल्लें. हे संबंदांतलो सगळो खर्च हस्तकला म्हामंडळा वतीन केल्लो. हें प्रशिक्षण पुराय जाले उपरांत अशे तरेची यंत्रणा केरी गांवांत बालभवन केंद्राच्या वाठारांत बसयल्या.
आत्मनिर्भर भारत आनी स्वयंपूर्ण गोंय हाच्या माध्यमांतल्यान समाजांतल्या दरेके बायलेच्या हाताक काम मेळचें हे खातीर प्रयोग सुरू केला. केरीच्या बायलांक ह्या प्रकल्पाक लागीन रोजगार मेळटलो. सध्या तरी 60 बायलांक अशा उपक्रमाच्या माध्यमांतल्यान रोजगार मेळटलो. फुडारांत हातूंत व्हड प्रमाणांत बायलो वांटो घेतल्यो अशी आस्त डॉ. राणे हांणी उक्तायली.
समाजांत आयजूय खूबशीं कुटुंबा अर्थीक नदरेन दुबळीं आसात. ताका लागून तांकां घरसंवसार चलयतना कसरत करची पडटा. बायलांक रोजगार मेळ्ळो जाल्यार तांकां बरे तरेचें अर्थीक फाटबळ मेळपाक शकता. सुती साडयांक आयज व्हड प्रमाणांत मागणी आसा. केरींत तयार जाल्ल्या सुती साडयांक बाजारांत निश्चीत बरें येस मेळटलें, अशी आस्त डॉ. राणे हांणी उक्तायली.
गोंय हस्तकला म्हामंडळाचे वेवस्थापकी संचालक अरविंद बुगडे हांणी सांगलें, ह्या वाठारांत अशे तरेचो हो पयलोच प्रयोग हातांत घेतला. हो प्रयोग निश्चीत येसस्वी जातलो. हे वरवीं ह्या वाठारांतल्या बायलांक रोजगाराचें बरें साधन मेळ्ळां.
आत्मनिर्भर भारत आनी स्वयंपूर्ण गोंय हाच्या माध्यमांतल्यान बायलांक बरे तरेचो रोजगार मेळचो हे खातीर अशे तरेची संकल्पना मुखार आयल्या. हाका लागून फुडारांत हे संकल्पनेच्या माध्यमांतल्यान बायलांक बरे तरेची अर्थीक उलाढालीची संद मेळटली. बायलांनी हातूंत सक्रीयपणान वांटेकार जावचीं, अशी विनवणी बुगडे हांणी केली. आमदार डॉ. राणे हांचे हस्तुकीं हातमाग यंत्रणेचें उक्तावण जालें. ह्या वेळार केरीची सरपंच दीक्षा गांवस, उपसरपंच भिवा गांवस, हेर पंच आनी थळावे नागरीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
