भांगरभूंय | प्रतिनिधी
मोरजे कांचोळेवाड्या वयल्या बायलांची मागणी; पंद्रशे सावन नळ सुके
भांगरभूंय । प्रतिनिधी
पेडणें: उदका बगर कशे जगतले? आमकां सरकारी नोकऱ्यो नाकात, वेळार उदका पुरवण करची. रातीर- मध्यान रातीर उदक पुरवण करचे बदला दिसाची वा फांतोडेर करची. नळांतल्यान उण्यांत उणीं तीन वरां नेमान उदक सोडचें, अशी मागणी मोरजेच्या कांचोळेवाड्या वयल्या बायलांनी केल्या.
मोरजी पंचायत वाठारांतल्या कांचोळेवाड्यार फाटल्या 15 दिसां सावन नळाक उदक ना. कांय घरांनी थेंब थेंब थेंबेता, तातूंत कळसुली न्हय, एक तांबयो लेगीत भरना. मध्यानरातीर केन्ना तरी उदक येता, पूण जागरण करून उदक येतलेंच हाचोय भरवसो आसना. आमकां नेमान सकाळच्या आदेसाक उदक दिवचें, अशी ह्या वाड्या वयल्या बायलांनी मागणी केल्या.
मोरजी पंचायत वाठारांतली उदकाची समस्या दिसान दीस गंभीर जायत आसा. एके वटेन उर्मलबागवाड्या वयल्यो बायलो उदका खातीर संघटीत जाल्यात. वेळार उदक आयलें ना जाल्यार आमदाराच्याच न्हय जाल्यार उदका पुरवण विभागाच्या कार्यालयाचेर कळसुली मोर्चो व्हरून सरकाराक जाब विचारपाचो निर्णय घेतला. आतां कांचोळेवाड्या वयल्या बायलांनी एकवटींत जावन सरकारा कडेन नेमान उदकाची मागणी केल्या. उदका खातीर परतून परतून सरकारा कडेन मागणी केली, अभियंत्यांक फोन केले, पूण आमकां उदक येना. घरांत नळ आसात, पूण उदक येना जाल्यार सरकार उदकाचें बील कशें दिता, असो प्रस्न बायलांनी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
