भांगरभूंय | प्रतिनिधी
जीत आरोलकारः उदका पुरवण विभागाच्या अधिकाऱ्यांक सुचोवणी
भांगरभूंय । प्रतिनिधी
पेडणें: आमकां कार्यावळी, उत्सव नाकात, आमकां उदक दियात, अशी विनवणी हालींसराक लोक आमदार आरोलकार हांचे कडेन करपाक लागल्यात. हेच फाटभुंयेर आमदार आरोलकार हांणी 2 मार्चाक पेडणेंच्या शासकीय विसवघरांत भौशीक बांदकाम खात्याच्या उदका विभागाच्या अधिकाऱ्यां वांगडा बसका घेतली आनी मांद्रें मतदारसंघा खातीर उदकाचें नियोजन वेवस्थीत करचें अशें सांगलें. हे बाबतींत आपूण कामचुकारपणा कसोच खपोवन घेवचो ना, अशेय तांणी शिटकायलें.
मांद्रें मतदारसंघांत सध्या पियेवपाच्या उदकाची समस्या गंभीर जायत चल्ल्या. ताका लागून आमदार जीत आरोलकार हांकां वचत थंय लोकांचें आयकून घेवचें पडटा. आमदार जंय जंय कार्यावळीक वतात वा एकादे बसकेक वता, थंय तांकां लोक आमकां उदक केन्ना मेळटले, असो प्रस्न विचारून बेजार हाडटात.
मांद्रें मतदारसंघांतल्या खूबशा घरांक नळाचें उदक येना, ताका लागून लोक तिडकल्यात. उदक मेळना जाल्यार लोकप्रतिनिधीच्या घराचेर मोर्चो व्हरतलीं, अशी शिटकावणी कांय बायलांनी दिल्ली. ते फाटभुंयेर आमदार आरोलकार हांणी अधिकाऱ्यांची ताकतिकेची बसका आपयली. हे बसकेंत मांद्रें मतदारसंघांत नेमान उदका पुरवण कशी करून येता हाचेर चर्चा जाली.
पत्रकारां कडेन उलयतना आमदार आरोलकार हांणी सांगलें, मांद्रें मतदारसंघांतली उदकाची समस्या सुटावी करचे खातीर आपणे अधिकाऱ्यां वांगडा खोलायेन चर्चा केल्या. खंयच्या वाठारांत उदक पावना, खंय उण्या दाबाची उदका पुरवण जाता, ते विशीं तांकां पुराय म्हायती दिल्या. तेचवांगडा मांद्रें मतदारसंघांतल्या सगळ्याच लोकांक फावोश्या प्रमाणांत टप्प्याटप्प्यान उदक मेळचें, हे खातीर म्हत्वाच्यो सुचोवण्यो केल्यात, अशें आरोलकार हांणी सांगलें. एप्रील उपरांत चांदेल उदक विस्तारीत प्रकल्प पुराय जातलो. ते उपरांत सुरळीत उदका पुरवण जातली, असो तांणी विस्वास उक्तायलो. आमदार जीत आरोलकार हांणी उदका पुरवण सुरळीत करपा संबंदांत म्हत्वाच्यो सुचोवण्यो केल्यात. सुरळीत उदका पुरवण करचे खातीर नवे प्रयोग करतले, अशें पेडणें उदका विभागाचे अधिकारी सोमा हांणी प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
