म्हापश्येंचे ‘पेटूल’ कार्यावळींत 300 भुरगीं वांटेकार

भांगरभूंय | प्रतिनिधी

येद्या व्हडल्या देशांत जंय 1600 परस चड भाशा आनी बोली आसात थंय कोंकणीची एक वेगळी
वळख निर्माण करपाचें काम कोंकणी भाशा मंडळान आपल्या खांदार उबारलां आनी तें बरे तरेन करतात अशें समाज वावुरपी आनी शिक्षक सुलक्षणा सावंत हांणी म्हणलें.

कोंकणी भाशा मंडळान बार्देस म्हालांत आयोजीत केल्ल्या ‘पेटूल’ कार्यावळींत ती मुखेल सोयरी म्हूण उलयताली. ही कार्यावळ श्री देव बोडगेश्वर संस्थानाच्या जोडपालवान संस्थानाच्या सभाघरांत जाली.
फकत पुस्तकांतल्यान न्हय जाल्यार एनिमेशन सारकेल्ल्या नव्या माध्यमांनी काम करीत कोंकणी भाशा दर एका भुरग्या मेरेन पावोवपाचो हावेस बाळगून मंडळ काम करता आनी ते खातीर सगळ्यांक तांची दखल घेवची पडटा. कोंकणीच्यो वेगवेगळ्यो बोलयो एकामेकांक लागीं हाडटात. भाशेचें शुद्धीकरण जितले गरजेचें तितलेचे ह्यो बोली भासोय तिगोवन दवरप गरजेचें अशें सावंत हांणी मुखार उलयतना म्हळें.
कार्यावळीक गोवा कोंकणी अकादेमीचे अध्यक्ष आनी साहित्यीक अरूण साखरदांडे, विमो सल्लागार प्रदीप जोशी आनी सेंट झेवियर्स महाविद्यालयाचे प्रशासक फा. आंतोनियो सालेमा हे मानाचे सोयरे म्हणून उपस्थीत आशिल्ले.
ह्या वेळार आस्था’ज आनंद निकेतन- स्पेशल स्कूल फॉर चिल्ड्रन विथ डिजेबिलीटीस, ब्लुमींगडेल्स प्रायमरी स्कूल, सेंट मेरीस कॉन्वेंट हाय स्कूल, श्री गणेश विद्यामंदीर, सिद्धकला डान्स इन्स्टिट्यूट, ज्ञानप्रसारक विद्यालय, सारस्वत विद्यालय, सेंट ऍन्थनी हायस्कूल, सेंट ब्रिटो हायस्कूल, सारस्वत विद्यालय प्रायमरी स्कूल, निर्भय भवः, सरकारी प्राथमीक शाळा, शेळपें आनी जी. एस. आमोणकार विद्यामंदीर ह्या शिक्षणीक संस्थांच्या विद्यार्थ्यांनी ‘शाणी मस्ती’ सिडींतल्या गितांचेर नाच सादर केले.
ही कार्यावळ आयोजीत करूंक नॅस्ले कंपनीन खास गिफ्ट हॅम्पर्स पुरस्कृत केल्लीं तशेंच बार्देस कोंकणी अस्मिताय केंद्र आनी सेंट झेवियर्स महाविद्यालय ह्या संस्थेचो आयोजनांत तेंको लाबलो. बार्देस म्हालांतल्या सुमार 300 भुरग्यांनी हे नाच आनी संगिताचे कार्यावळींत भाग घेतलो.