भांगरभूंय | प्रतिनिधी
ऑस्ट्रेलिया पंगडान इंदोर टॅस्ट 9 विकेटींनी जिखली. भारतान फकत 76 धांवड्यांची मोख दिल्ली. ऑस्ट्रेलियेन ती खेळ सुरू जायना फुडें 76 मिनटां भितर मेळयली. ट्रेव्हिस हेडान 49 धांवड्यांची खेळी केली. ह्या जैता सयत ऑस्ट्रेलियेन चार मॅचींचे माळेंत 2-1 अशें पुनरागमन केलें. माळेंतली निमाणी मॅच 9 ते 13 मार्च मेरेन अहमदाबादांतल्या नरेंद्र मोदी स्टेडियमाचेर जातली.
हारी उपरांत भारताचो मुखेली रोहित शर्मान म्हणलें, स्पीन फ्रँडली खेळपट्टीचेर खेळपाचो निर्णय पंगडाचो निर्णय आशिल्लो. आमच्या बॅट्समनांक लेगीत अशे खेळपट्टीचेर खेळप आव्हानात्मक आसतलें हें आमकां खबर आशिल्लें आनी ताका आमी तयार आशिल्ले. पूण, भारताच्या बॅट्समनांनी पयल्या डावांत बाबत प्रदर्शन केलें.
तिसऱ्या दिसा ऑस्ट्रेलियेक 76 धांवड्यांची मोख मेळिल्ली. पूण, आश्विनान दिसाच्या दुसऱ्याच बॉलाचेर उस्मान ख्वाजाक शुन्याचेर बाद करून भारताच्या क्रिकेट मोग्यांची आस्त जागयली. भारताचे स्पिनर सुरवातीच्या 11 ओव्हरी मेरेन आपलो शेक दवरलो. पूण, 12वे ओव्हरींत बॉल बदल्ल्या उपरांत परिस्थिती बदल्ली. हाचे पयलीं ऑस्ट्रेलियेन 13 धांवड्यो केल्ल्यो. नव्या बॉलाचेर ऑस्ट्रेलियेच्या बॅट्समनांनी सात ओव्हरींनी उरिल्ल्यो 63 धांवड्यो केल्यो.
मार्नस लाबशेनान आश्विनाच्या बॉलाचेर चवको मारून पंगडाक जैत मेळोवन दिलें. ट्रॅव्हिस हेडान 49 आनी मार्नस लाबशेनान नाबाद 28 धांवड्यो केल्यो.
ते पयलीं भारतान दुसऱ्या डावांत 163 धांवड्यो करून 75 धांवड्यांची आघाडी घेतली. जाल्यार ऑस्ट्रेलियेन पयल्या डावांत 197 धांवड्यो करून पयल्या डावांत 88 धांवड्यांची आघाडी घेतिल्ली. भारताचो पयलो डाव फकत 109 धांवड्यांचेर सोंपिल्लो.मजगतीं, ऑस्ट्रेलियेन ही मॅच जिखून आयसीसी संवसारीक टॅस्ट वस्तादपण 2023चे फायनलींत सुवात मेळयली. दोनूय पंगडांक संवसारीक टॅस्ट वस्तादपण सर्तीचे फायनलीचे दिश्टीन ही मॅच म्हत्वाची आशिल्ली. पूण, ऑस्ट्रेलियेन जैत जोडून फायनलीतली सुवात निश्चीत केली. भारताक फायनलीचे दिश्टीन चवथी टॅस्ट जिखपाकूच जाय. बरोबरींत सुटली वा हारलो जाल्यार न्युझिलॅण्ड आनी श्रीलंका ह्या पंगडां मदीं जावपी टॅस्ट माळेचेर निंबून रावचें पडटलें.
होळकर मैदानाचे खेळपट्टीक बाबत थारावन मॅच रॅफ्रीन हे विशींचो अहवाल आयसीसीक सादर केलो. मॅच रिपोर्टांत होळकर स्टेडियमाचे खेळपट्टीक तीन डिमेरिट पॉयण्ट दिल्ल्याची खबर मुखार आयल्या. ह्या अहवाला आड अपील करपाक बीसीसीआयक 14 दिसांचो वेळ दिला. पयल्या दोन दिसांनी 30 बॅट्समन बाद जाल्ले.
संवसारीक टॅस्ट वस्तादपण सर्तीची फायनल इंग्लंडांतल्या ओव्हल मैदानाचेर जातली. फायनल 7 ते 11 जून मेरेन चलतली. जाल्यार 12 जून राखीव दीस दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
