भांगरभूंय | प्रतिनिधी
हांगाच्या शेरे बांग्ला नॅशनल स्टेडियमाचेर जाल्ले मॅचींत इंग्लंडान येजमान बांगलादेशाक 132 धांवड्यांनी हारयलो. इंग्लंडाच्या जैतांत दोन खेळगड्यांचें म्हत्वाचें योगदान आशिल्लें. पयलीं जेसन रॉयान 132 धांवड्यांची खेळी करून पंगडाचो स्कोर 326 धांवड्यां मेरेन पावयलो. ते उपरांत फास्ट बॉलर सॅम करनान फकत 29 धांवड्यांनी चार विकेटी घेवन बांगलादेशाचो डाव 194चेर सोंपयलो. माळेंतली पयली मॅच लेगीत इंग्लंडानूच जिखिल्ली. अशे तरेन तीन मॅचींचे माळेंत इंग्लंडान 2-0 अशी निर्णायक आघाडी घेतली.
टॉस हारल्या उपरांत पयलीं बॅटींग करपी इंग्लंडाक रॉयान बरी धांवसंख्या उबारून दिवपाक मजत केली. रॉयान सोल्ट (7), मलान (11) आनी जेम्स विंस (5) रोखडेच बाद जावन लेगीत स्कोर मुखार व्हेलो. ते उपरांत रॉयान जोस बटलरा वांगडा मेळून स्कोर मुखार व्हेलो. दोगांयनी 36वे ओव्हरींनी इंग्लंडाचो स्कोर 200च्या वयर व्हेलो. रॉय 124 बॉलांनी 132 धांवड्यो करून बाद जालो. ताणें 18 चवके आनी एक सको मारलो. बटलरान 64 बॉलांनी पांच चवके आनी दोन सक्यांचे मजतीन 76 धांवड्यो करपाक येसस्वी थारलो.
मोईन अलीन 35 बॉलांनी तीन चवके आनी दोन सक्यांचे मजतीन 42 आनी सॅम करनान 19 बॉलांनी 33 धांवड्यो करून पंगडाचो स्कोर 326 धांवड्यां मेरेन पावयलो. बांगलादेशा वतीन तस्कीन अहमदान 66 धांवड्यो दिवन तीन जाल्यार मेहदी हसन मिराजान 73 बॉलांनी दोन विकेटी घेतल्यो.
मोखीचो फाटलाव करपाक मैदानांत देंवपी बांगलादेशाक सॅम करनान पयल्या दोन ओव्हरींनी तीन धपके दिले. लिटन दास, शंटो हांकां शुन्याचेर बाद केल्या उपरांत मुशफिकर रहिमनाक बाद केलो. मुखेली तमिम इक्बाल 35 धांवड्यो करून तंबूंत परतलो. जाल्यार शाकिब अल हसनान एक बाजू सांबाळून धरतना 69 बॉलांनी 58 धांवड्यो केल्यो. महमदुल्लाहान 32 आनी अफीफ हुसैनान 23 धांवड्यो करून बांगलादेशाचो डाव सांबाळपाचो यत्न केलो. पूण, आदिल रशिदान आक्रमक स्पेल घालून चार विकेटी घेवन बांगलादेशाचो डाव 194चेर सोंपयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
