भांगरभूंय | प्रतिनिधी
म्हापशेंकारांची उपसभापती कडेन मागणी, 40 वर्सांची परंपरा आशिल्ल्याचो दावो
भांगरभूंय । प्रतिनिधी
म्हापशें: म्हापशेंच्या शिगम्याक व्हड इतिहास आनी परंपरा आसा. ह्या शिगम्याक धर्मीक अधिश्ठान लाबलां. फाटल्या 40 वर्सां सावन म्हापश्यां शिगमो मिरवणूक आयताराच आयोजीत करतात. पूण अंदूं ही मिरवणूक आयतारा बदला सोमारा आयोजीत केल्ल्यान म्हापशेंकार बेजार जाल्यात. ताका लागून मुख्यमंत्री आनी पर्यटन मंत्र्यांची समजूत काडून मिरवणुकेचें आयोजन आयताराच करचें, अशी नेटाची मागणी म्हापशेंच्या जागरूक नागरिकांनी उपसभापती ज्योशुआ डिसोझा हांचे कडेन केल्या.
बिरेस्तारा पालिका कार्यालयांत ह्या जागरूक नागरिकांच्या शिश्टमंडळान उपसभापती डिसोझा हांची भेट घेतली. ह्या वेळार नगराध्यक्ष प्रिया मिशाळ, नगरसेवक प्रकाश भिवशेट, सुशांत हरमलकार हाजीर आशिल्ले. शिश्टमंडळांत आदले नगरसेवक तुषार टोपले, नारायण राटवड, सचीन किटलेकार, एकनाथ म्हापसेकार, श्रीपाद येंडे, अच्युत वेर्णेंकार आनी राजू तेली हांचो आस्पाव आशिल्लो.
शिगम्या निमतान जावपी रोमटामेळ, लोकनाच आनी चित्ररथ मिरवणूक हो धर्मीक उत्साव. तो खंयच्या दिसा मनोवचो हातूंत सरकार हस्तक्षेप करपाक शकना. फाटलीं 40 वर्सां म्हापशें शिगमो उत्सव समिती वतीन काडटात ती मिरवणूक आयताराच जाताली, पूण अंदूं मात ती सोमारा 13 मार्चाक काडपाचें सरकारान जाहीर केलां. हें परंपरेक धरून ना, असो दावो तुषार टोपले आनी हेरांनी केलो.
उपसभापती डिसोझा हांणी सांगलें, शिश्टमंडळाचें म्हणणें आपणें आयकून घेतलां. हो प्रस्न सोडोवचे खातीर आपूण यत्न करतलों. तशेंच हे विशी शिश्टमंडळाक एक निवेदन सादर करपाची विनवणी केल्या. मजगतीं, पर्वरे नव्यान सुरू जावपी शिगमो उत्सवाक आयतारचो दीस दिवन सरकारान म्हापशेंकाराक कुशीक दवरल्यात. हे विशीं खोर्ली शीम वाठारांतल्या श्री राष्ट्रोळी देवळाच्या सभाघरांत बुधवारा सांजेवेळार आयोजीत केल्ले बसकेंत म्हापशेंकारांनी नाराजी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
